नगरपालिकाले निःशुल्क दिएका जर्सी गाईमा रोग भेटियो

साउन २६, २०७६ आइतबार १७:१५:१२ | विमल बिष्ट

डोटी – दिपायल सिलगढी नगरपालिकाले वडा नम्बर-४ को स्थानीय ‘तेडी निमउने’ गाईपालन समूहका किसानलाई निःशुल्क वितरण गरेका गाईमा रोग देखिएको छ ।

केही दिन अघि सात जना कृषकलाई पूर्ण अनुदानमा उपलब्ध गराइएका जर्सी गाईले भने जति दूध दिनुको साटो मर्न थालेपछि किसानहरु हैरान भएका छन् ।

स्थानीय दिलबहादुर कठायतले भन्नुभयो, ‘एउटै गाईले २० लिटर दूध दिन्छ भनेर हामीलाई दिए, बूढी गाई फेला पर्‍यो, गाईले दूध दिनुको साटो बिरामी पर्न थालेपछि हामी त हैरान भयौँ ।’

‘जर्सी गाई पायौँ, दूध बेचेर आम्दानी गरौँला भनेको त उल्टै गाई बिरामी परे, औषधि गर्दैमा पैसा सकिने भयो’, दिलबहादुरले भन्नुभयो । अधिकांश किसानले नगरपालिकाबाट गाई बुझेकै दिनदेखि गाई बिरामी परेको बताएका छन्, केही गाईको पाठेघर कुँहिएको छ ।

‘बेलाबेला पछाडिको भागबाट किरासहितको पीप खस्छ, जसले घर नै गन्हाउँछ’, अर्का किसान तथा ‘तेडी निमउने’ गाईपालन समूहका अध्यक्ष हिरा कठायतले भन्नुभयो, ‘कुन ठाउँका रोगी गाई हामीलाई भिडाए, घाउ गन्हाएर गाउँ नै दुर्गन्धित भएको छ ।’

नगरपालिकाले टेण्डर आह्वान गरेर एउटा गाईकाे ७५ हजार रुपैयाँका दरले नगरक्षेत्रका २० जना किसानलाई हस्तान्तरण गरेको पशु सेवा इकाइका अधिकृत डिलबहादुर साउदले बताउनुभयो । उहाँले भन्नुभयो, ‘नगरपालिकाले टेण्डर आह्वान गरेर कञ्चनपुर बेलौरीको सिद्धबाबा गाईभैँसीपालन फार्मबाट गाई आयात गरिएको हो । मैले गाई राम्रै आएको जानकारी पाएको छु, अहिले के भयो थाहा भएन ।’

जर्सी गाई भनेर वितरण गरिएका गाईहरु शत प्रतिशत जर्सी भएको र क्रस तथा होलेस्टेन जातका गाईहरु रहेको जानकारहरु बताउँछन् । किसानलाई वितरण गरिएका गाईको मूल्य १५ लाख रुपैयाँ हुन आउँछ । किसानहरुको स्याहारसुसार र गोठ व्यवस्थापन नमिलेकोले गाईहरु बिरामी परेको र दूध नदिने समस्या भएको हुन सक्ने पशु सेवा इकाइका अधिकृत डिलबहादुर साउद बताउनुहुन्छ ।

नगरपालिकाले वितरण गरेको गाईमध्ये एउटा गाईको बाच्छो मरेको किसानहरुले बताएका छन् । उता टेण्डर प्रक्रियाबाट गाई हस्तान्तरण गरेको सिद्धबाबा गाईभैँसी फर्मका सञ्चालक हिरासिंंह विष्टले नगरपालिकाको सम्झौता अनुसारकै गाई पठाइएको दावी गर्नुभएको छ । उहाँले भन्नुभयो, ‘नगरपालिकाको माग अनुसारका गाईहरु भारतको बरेली र हरियाणाबाट झिकाइएको हो । अहिले त्यहाँ के भयो, मलाई थाहा भएन ।’

दिपायल सिलगढी नगरपालिका वडा नम्बर–४ का वडाध्यक्ष वीरेन्द्र शाहले जर्सी गाईहरुमा देखिएको समस्या तत्काल नगरपालिकामा राख्ने बताउनु भयो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्