काठमाण्डाै - नेपाल कम्युनिष्ट पार्टी (नेकपा) का अध्यक्ष पुष्पकमल दाहालले नेत्र विक्रम चन्द ‘विप्लव’ लाई पार्टीमा आउन ढिलाइ नगर्न आग्रह गर्नुभएको छ । 

शनिबार पार्टी कार्यालय धुम्बाराहीमा आयोजना भएको पार्टी प्रवेश कार्यक्रममा अध्यक्ष दाहालले विप्लवलाई यस्तो आग्रह गर्नुभएको हो । विप्लव नेतृत्वको नेकपाका पोलिटब्युरो सदस्य मोहन कार्की लगायतलाई पार्टी प्रवेश गराउँदै दाहालले भन्नुभयो, ‘भोलि स्वयं विप्लव पनि आउनुपर्छ । आउन ढिला गर्नुभयो भने त्यसले उहाँलाई पनि फाइदा गर्दैन । अरुलाई पनि फाइदा गर्दैन ।’

अध्यक्ष दाहालले बाँकी रहेका सबैलाई अफ्ठ्यारो नमानी आउन अपिल गर्नुभयो । गरिहाले, हिँडिहाले भनेर आफैँलाई अनि देशलाई हानी पुर्‍याउने काम नगरी छिटो पार्टीमा आउन उहाँले सबैलाई आग्रह गर्नुभयो ।

पार्टी प्रवेशपछि कार्कीले विप्लवको राजनीतिक साहस, नैतिकता र इमानदारिता नदेखेर पार्टी छाडेको बताउनुभयो । ‘सहजै विप्लव छोडेर आउने पक्षमा म थिइनँ । तर विप्लवको त्यो राजनीतिक साहस, नैतिकता र इमानदारिता देख्न सकिन । हिरासतपछि मेरो एकान्त बास भयो । मलाई भेटन कोही आएन’, उहाँले भन्नुभयो, ‘वार्तामा आउ, आफ्ना कुरा राखौँ भन्दा मान्ने अवस्था भएन । आफूले गरेका कुरा र कामहरुको स्वामीत्व लिनसक्ने अवस्था नदेखेपछि विप्लव छोडेँ ।’

पार्टी कार्यालय धुम्बाराहीमा भएको पार्टी प्रवेश कार्यक्रममा अध्यक्ष दाहाल, महासचिव विष्णु पौडेल लगायतका नेताहरुको सहभागिता रहेको थियो ।