सेतीदेवी वनकाे रुख काटेर बेचेकाे आराेपमा डीएफओसहित १३ जनाविरुद्ध भ्रष्टाचारकाे मुद्दा

 पुस २७, २०७६ आइतबार २०:२२:४४ | उज्यालो सहकर्मी
unn.prixa.net

काठमाण्डाै - सेतीदेवी वनकाे रुख काटेर विक्री गरेको आरोपमा अख्तियार दुरुपयोग अनुसन्धान आयोगले जिल्ला वन कार्यालय मकवानपुरका तत्कालीन डीएफओसहित १३ जनाविरुद्ध डेढ करोड भ्रष्टाचार गरेकाे भन्दै मुद्दा दायर गरेको छ ।

तत्कालीन वन अधिकृत डीएफओ राजेन्द्र न्यौपाने, सहायक वन अधिकृतहरु रामबाबु यादव, राजेन्द्रमान राजभण्डारी, विशाल भट्टराई, सोनालालप्रसाद जयसवाल र नारायणबहादुर कार्कीविरुद्ध विशेष अदालतमा मुद्दा दायर भएको हो ।

तत्कालीन रेन्जर राजु लामा, फरेस्टर मोहनराज घिमिरे, वन रक्षक किरणकुमार क्षेत्री र धनलाल यादव तथा सेतीदेवी सामुदायिक वन उपभोक्ता समूहका अध्यक्ष कमानसिंह न्यासुर, सचिव हरिमाया मोक्तान र कोषाध्यक्ष रेजिना गोलेलाई पनि मुद्दा लगाइएको छ ।

कर्मचारी तथा सेतीदेवी सामुदायिक वन उपभोक्ता समूहका पदाधिकारीको मिलेमतोमा ९ हजार १७८ क्यूफिट काठ हुने गरी हरिया साल तथा अस्त्रा जातका रुखहरु काटेर एक करोड ५२ लाख १९ हजार ३२६ रुपैयाँ ७६ पैसा भ्रष्टाचार गरेको अख्तियारको दाबी छ ।

अन्तिम अपडेट: चैत १३, २०८०

तपाईको प्रतिक्रिया