काठमाण्डौ - चर्चमा भएको आकस्मिक भागदौडका क्रममा ताञ्जानियामा कम्तीमा २० जनाको ज्यान गएको छ । देशको उत्तरतर्फ रहेको चर्चमा भएको घटनामा परेर उनीहरुको ज्यान गएकाे सरकारी अधिकारीहरुले आइतबार जानकारी दिएका छन् ।

जिल्ला आयुक्त किप्पी वारीओबाले मोशी शहरमा भएको घटनामा परी ज्यान गुमाउनेकाे सङ्ख्या अझ बढ्ने खतरा रहेको बताउनुभयो । उहाँका अनुसार घटना शनिबार दिउँसो भएको हो ।

‘घटनामा परेर कम्तीमा २० जनाको मृत्यु भएको छ, अरू केही घाइते भएका छन् । घाइतेमध्ये केहीको अवस्था गम्भीर रहेकाले मृत्यु हुनेको सङ्ख्या अझ बढ्न सक्ने देखिएको छ,’ उहाँले भन्नुभयाे । 

शनिबारीय साप्ताहिक प्रार्थनाका लागि भेला भएकाहरुको एकाएक भागदौड हुँदा च्यापिएर ज्यान गएको वारीओबाले बताउनुभयो । तान्जानियाका मन्त्रीसमेत रहेका चर्चित पादरी बोनिफाक म्वाम्पोसाले प्रार्थनाको नेतृत्व गर्नुभएको थियो । 

उहाँले आफूलाई ‘ईश्वर दूत’का रुपमा व्याख्या गरिरहेका बेला भागदौड मच्चिएको प्रत्यक्षदर्शीले जनाएका छन् ।