दाङ - दाङमा थप चार जनामा कोरोना सङ्क्रमण देखिएको छ । थपिएका चार जनासँगै दाङमा कोरोना सङ्क्रमितको सङ्ख्या ८० जना पुगेको छ ।

सोमबार दाङको राप्ती स्वास्थ्य विज्ञान प्रतिष्ठानमा गरिएको स्वाब परीक्षणका क्रममा बङ्गलामुखी गाउँपालिका-१ का ३ पुरुष र घोराही उपमहानगरपालिका-१८ का एक जना पुरुषमा कोरोना सङ्क्रमण देखिएको राप्ती स्वास्थ्य विज्ञान प्रतिष्ठानका निमित्त कायम मुकाय रजिष्ट्रार कैलाशप्रसाद देवले जानकारी दिनुभएको छ ।

उनीहरुमध्ये बङ्गलामुखी गाउँपालिका-१ निवासी ३१, ४३ र ७० वर्षीयका पुरुष र घोराही-१८ निवासी ५९ वर्षीय एक पुरुष रहेका छन । उनीहरुमध्ये घोराहीका ५९ वर्षीय पुरुषको भारतको दिल्लीमा ज्यान गएको थियो । ज्यान गएपनि आइतबार घोराही ल्याइएको उनको शवको परीक्षणका क्रममा कोरोनाको सङ्क्रमण देखिएको थियो ।