डोटी - क्वरेण्टीनमा आइतबार बिहान ज्यान गुमाएका डोटी केआइसिंह गाउँपालिका-३ दल्लका १९ वर्षीय युवक नरेशबहादुर ऐरको कोरोना परीक्षण रिपोर्ट नेगेटिभ आएको छ । कोरोनाको पीसीआर रिपोर्ट नेगेटिभ आएसँगै सोमबार साँझ उहाँको दाहसंस्कार गरिएको छ ।

क्वरेण्टीनमा रहेको बेला उहाँको मृत्यु भएपछि स्वाब सङ्कलन गरी परीक्षणका लागि धनगढीको सेती प्रादेशिक अस्पतालमा रहेको प्रयोगशालामा पठाइएको थियो । 

मृतकसँगै बसेका अन्य ९ जनाको स्वाब परीक्षणको रिपोर्ट पनि नेगेटिभ आएको जिल्ला स्वास्थ्य कार्यालय डोटीका प्रमुख रमेश मलासीले बताउनुभयो ।

उहाँले भन्नुभयो, ‘मृतक र अन्य नौ जनाको कोरोना परीक्षण रिपोर्ट नेगेटिभ आएको छ । आत्तिनुपर्ने अवस्था छैन ।’ कैलालीमा एक मात्र पीसीआर मेसिन रहेकोले परीक्षण हुन समय लागेको प्रमुख मलासीले जानकारी दिनुभयो ।