स्याङ्जा - स्याङ्जाका ३ जना  कोरोना जितेर घर फर्किएका छन् । 

जिल्ला अस्पतालको आइसोलेसनमा रहेका ६ जनामध्ये ३ जना कोरोना सङ्क्रमितको पीसीआर परीक्षणमा नेगेटिभ रिपोर्ट आएपछि आज घर पठाइएको जिल्ला अस्पताल स्याङ्जाका कोरोना फोकल पर्शन डाक्टर अन्जु अर्यालले जानकारी दिनुभयो । 

घर फर्कनेमा वालिङ नगरपालिकाका २१ वर्षका पुरुष र गल्याङ् नगरपालिकाका २७ र ४० वर्षका २ जना पुरुष रहेका छन् । उनीहरुलाई स्याङ्जाका प्रमुख जिल्ला अधिकारी गंगाबहादुर क्षेत्रीलगायतले बिदाई गरेका हुन् ।

गएको जेठ २२ गते जिल्ला अस्पतालमा उपचाररत ६ जना पुरुष र उपचारमा संलग्न स्वास्थ्यकर्मीहरुको पीसीआर परीक्षणका लागि स्वाब लिई पोखरा पठाइएको थियो । जसमा ३ जना सङ्क्रमित र स्वास्थ्यकर्मींहरु सबैको कोरोना नेगेटिभ आएको फोकल पर्शन डाक्टर अर्यालले जानकारी दिनु्भयो ।

वालिङका कोरोना मुक्त भएका पुरुष जेठ १३ मा र गल्याङका पुरुष जेठ १८ मा सङ्क्रमण भएको थियो । अब जिल्ला अस्पतालको आइसोलेसनमा ३ जना पुरुष उपचाररत छन भने कालिका सामुदायिक अस्पतालको आइसोलेसनमा एक महिलासहित ३१ जना उपचार गराइरहेका छन् । 

स्याङ्जाका कोरोना सङ्क्रमित एक जनाको ज्यान गइसकेको छ । योसहित जिल्लामा जम्मा सङ्क्रमितको संख्या ३८ रहेको छ ।