सङ्क्रमण दर घट्यो भनेर हेलचेक्र्याइँ गर्दा अवस्था भयावह हुन सक्छ : स्वास्थ्य मन्त्रालय

 असार २५, २०७७ बिहिबार १७:४४:७ | उज्यालो सहकर्मी
unn.prixa.net

काठमाण्डौ – नेपालमा कोरोना भाइरसको सङ्क्रमण दर घट्दै गए पनि जोखिम भने कायमै रहेको स्वास्थ्य तथा जनसङ्ख्या मन्त्रालयले जनाएको छ ।

मन्त्रालयको नियमित पत्रकार सम्मेलनमा प्रवक्ता डाक्टर जागेश्वर गौतमले सङ्क्रमितको सङ्ख्या कम हुँदै गए पनि जोखिम बढिरहेको बताउनुभएको हो । उहाँले पछिल्लो समय मानिसको हेलचेक्र्याइँ पनि बढेकाेले स्थिति भयाभह हुन सक्ने भन्दै सचेत रहन आग्रह गर्नुभएको छ ।

मन्त्रालयका प्रवक्ता डाक्टर गौतमले सङ्क्रमण कम गर्न सबै सचेत नभए फेरि सङ्क्रमितको सङ्ख्या बढ्ने चेतावनीसमेत  दिनुभयो । यसअघि गएकाे मङ्गलबार नेपालमा दुई सय चार जनामा कोरोनाकाे सङ्क्रमण पुष्टि भएको थियो भने बुधबार दुई सय ५५ जना सङ्क्रमित थपिएका थिए ।

बिहीबार भने एक सय आठ जनामा काेराेना भाइरसकाे सङ्क्रमण पुष्टि भएकाे मन्त्रालयले जनाएकाे छ । बिहीबार थपिएकासँगै नेपालमा काेराेना भाइरसबाट सङ्क्रमित हुनेकाे सङ्ख्या १६ हजार पाँच सय ३१ पुगेकाे छ । 

त्यस्तै बिहीबार एक सय ३९ जना सङ्क्रमणमुक्त भएर डिस्चार्ज भएसँगै निकाे भएर घर फर्किनेकाे सङ्ख्या सात हजार आठ सय ९१ पुगेकाे मन्त्रालयले जनाएकाे छ । काेराेना सङ्क्रमणकाे कारण अहिलेसम्म ३५ जनाकाे मृत्यु भएकाे छ । 

अन्तिम अपडेट: फागुन ३०, २०८०

तपाईको प्रतिक्रिया