स्याङ्जा पहिरो अपडेट : ३ जनाको ज्यान गयो, एककाे खाेजी हुँदै

 असार ३०, २०७७ मंगलबार १८:५०:४२ | राधाकृष्ण डुम्रे
unn.prixa.net

स्याङ्जा – स्याङ्जाको कालीगण्डकी गाउँपालिका ४ काे खहरेमा गएको पहिरोमा पुरिएकामध्ये तीन जनाको ज्यान गएको छ । पहिरोमा पुरिएका एक जनाको खोजी भइरहेकाे छ । 

पहिरोमा पुरिएकाकाे नेपाली सेना, सशस्त्र प्रहरी तथा जनपथ प्रहरी तथा एक्स्काभेटरको सहायतामा खोजी गर्ने क्रममा तीन जनाको शव फेला परेको हो । जसमध्ये दुई जनाको सनाखत भएको स्याङ्जाका प्रमुख जिल्ला अधिकारी गंगाबहादुर क्षेत्रीले जानकारी दिनुभयो । उहाँ घटनास्थलमै पुग्नुभएकाे छ ।  

पहिरोमा पुरिएर तत्कालीन बिर्घा गाविसका अध्यक्ष ७० वर्षीय ईमानसिंह राना र ६० वर्षीय जिमानसिंह थापाको ज्यान गएको पुष्टि भएको हो । अर्का एक जनाको भने सनाखत हुन बाँकी छ ।

मङ्गलबार बिहान पहिरो झरेको थाहा पाएपछि हेर्न गएका रानासहित पाँच जनालाई पहिरोले पुरेको थियो भने एक जनाले भागेर ज्यान बचाएका थिए । प्रहरीले भने बाटो हिँड्ने क्रममा माथिबाट पहिरो आएको जनाएको छ । 

जीवितै उद्वार गरिएका ६८ वर्षीय होमनाथ पाण्डे र ५५ वर्षीय वीरबहादुर रानाको गल्याङमा उपचार भइरहेको छ  । 

त्यस्तै त्यही खहरे खोलाले धार परिवर्तन गर्दा चार घर परिवार विस्थापित भएकाे प्रहरीले जनाएको छ । स्थानीय वीरबहादुर राना,देव बहादुर थापा,जिमान्सिंह राना र तिलीसरा थापाको परिवार विस्थापित भएको हो । 

अन्तिम अपडेट: साउन १, २०७७

राधाकृष्ण डुम्रे

स्याङजाका पत्रकार राधाकृष्ण डुम्रे उज्यालोका जिल्ला सम्वाददाता हुनुहुन्छ । 

तपाईको प्रतिक्रिया