गोरखा संग्रहालयको भ्रमण गर्ने पर्यटक अहिलेसम्मकै उच्च

साउन २०, २०७५ आइतबार ९:२२:५५ | किरण लोहनी

गोरखा – ऐतिहासिक गोरखा संग्रहालयको भ्रमण गर्ने पर्यटकको संख्या अहिलेसम्मकै उच्च रहेको पाइएको छ । २०६५ सालमा खुल्ला गरिएको संग्रहालयमा गएको आर्थिक वर्ष २०७४/७५ मा अहिलेसम्मकै सबैभन्दा धेरै पर्यटकले अवलोकन गरेका हुन् ।

गएको आर्थिक वर्षमा ७७ हजार ७ शय ५३ जनाले संग्रहालयको अवलोकन गरेका संग्रहालय प्रमुख नवराज अधिकारीले बताउनुभयो । अघिल्लो आर्थिक वर्षको तुलनामा ७ प्रतिशत बढीले संग्रहालयको अवलोकन गरेका उहाँले बताउनुभयो ।आर्थिक वर्ष २०७३/७४ मा ७२ हजार ६ शय ४८ जनाले गोरखा संग्रहालयको अवलोकन गरेका थिए ।

गएको वर्ष अवलोकन गर्नेमध्ये नेपाली विद्यार्थीको संख्या अघिल्लो आर्थिक वर्षको तुलनामा घटेको भए पनि विद्यार्थी बाहेक आन्तरिक पर्यटक, सार्क राष्ट्र र अन्य देशका पर्यटकको संख्या भने बढेको उहाँको भनाइ छ ।

संग्रहालय भ्रमण गर्ने दर्शकको संख्या ७ प्रतिशतले बढ्दा आम्दानी भने १२ प्रतिशतले बढेको छ । संग्रहालय प्रवेश शुल्कबाट गएको आर्थिक वर्षमा १६ लाख ३२ हजार ६ शय ४५ रुपैयाँ राजस्व संकलन भएको अधिकारीले जानकारी दिनुभयो । यसअघि आर्थिक वर्ष ७३÷७४ मा भने १४ लाख ५७ हजार रुपैयाँ आम्दानी भएको थियो ।

तत्कालीन राजा राजेन्द्रबिक्रम शाहले छोरा सुरेन्द्रविक्रम शाहका लागि बनाइदिएको दरबारमै २०६५ सालदेखि संग्रहालय स्थापना गरिएको हो । परम्परागत नेपाली वास्तु शैलीबाट बनेको दरबार भएकाले यससम्बन्धी अध्ययन गर्न चाहनेका लागि पनि गोरखा संग्रहालय उत्कृष्ट गन्तव्यको बनेको छ ।

संग्रहालयमा ऐतिहासिक पक्ष झल्कने १२ वटा कक्ष रहेका छन् । गोरखा संग्रहालय रहेको दरबार ४ रोपनी क्षेत्रफलमा फैलिएको छ भने संग्रहालय परिसरको क्षेत्रफल भने ६८ रोपनी रहेको छ ।

सार्वजनिक विदाबाहेक हरेक मंगलबार संग्रहालय बन्द हुने गरेको छ । जिल्लावासीले हप्ताको सातै दिन संग्रहालय खुल्ला गर्नुपर्ने माग गर्दै आएका छन् । यसबारे पुरातत्व विभागसँग छलफल भैरहेको संग्रहालय प्रमुख नवराज अधिकारीले बताउनुभयो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्