काठमाण्डाै – स्वास्थ्य तथा जनसङ्ख्या मन्त्रालयले कोभिड–१९ को सङ्क्रमण केही पनि होइन भनेर नबुझ्न आग्रह गरेको छ ।

नियमित प्रेस ब्रिफिङमा मन्त्रालयका प्रवक्ता डाक्टर जागेश्वर गौतमले सङ्क्रमणको जोखिम दिनानुदिन बढिरहेको अवस्थामा केही पनि होइन भन्ने खालका भ्रममा नपर्न आग्रह गर्नुभएको हो ।

'कोभिड–१९ केही पनि होइन भन्ने खालका भ्रम सिर्जना गर्ने, गलत तर्क जम्मा गर्ने र समाजलाई जोखिमतिर उन्मुख गराउने खालका व्यक्तिले यस रोगको रोकथाम र नियन्त्रणमा चुनौती खडा हुन जान्छ, उहाँले भन्नुभयो , 'यस्तो खालका भनाइमा चनाखो भइ दिन हुन र आफ्नो टोल, छिमेकलाई सङ्क्रमणमुक्त बनाउने अभियानमा लाग्न अनुरोध छ ।'

शुक्रबार काठमाण्डाै उपत्यकामा ६ सय ९६ जनासहित देशभरि एक हजार चार सय ५४ जनामा कोरोनाकाे सङ्क्रमण पुष्टि भएको छ । उहाँले कोभिड–१९ रोगका नियन्त्रण र रोकथामका लागि अपनाउनुपर्ने जनस्वास्थ्यका मापदण्डविरुद्ध नकारात्मक टिप्पणी तथा अभिव्यक्तिसमेत कसैले पनि नदिन र सञ्चारमाध्यमले पनि त्यस किसिमका भ्रम प्रचार प्रसार नगर्न अनुरोध गर्नुभयो ।

प्रवक्ता गौतमले कोरोना रोकथाम र नियन्त्रण गर्न स्वास्थ्यकर्मी अहोरात्र खटिरहेकोले सबैलाई जनस्वास्थ्यका न्यूनतम मापदण्ड अनिवार्य पालना गर्न आग्रह गर्नुभयो ।