काठमाण्डाै – नेपाल कम्युनिस्ट पार्टी (नेकपा) काे प्रचण्ड–नेपाल समूहका वरिष्ठ नेता झलनाथ खनालले नेकपा नफुटेको दाबी गर्नुभएको छ । 

प्रचण्ड–नेपाल समूहको केन्द्रीय कमिटी बैठकको निर्णय तथा पार्टीका आगामी कार्यक्रमको सम्बन्धमा जानकारी दिन शुक्रबार आयोजित पत्रकार सम्मेलनमा सञ्चारकर्मीहरूको प्रश्नको जवाफ दिँदै वरिष्ठ नेता खनालले नेकपा अहिलेसम्म नफुटेको दाबी गर्नुभएको हो ।

उहाँले नेकपालाई फुट्न संविधानले नदिने तर्क गर्नुभयो । पार्टी फुट्न संसदीय दलमा ४० प्रतिशत पुर्‍याउनुपर्ने र केन्द्रीय कमिटीमा ४० प्रतिशत पुर्‍याउनुपर्ने व्यवस्था रहेको भन्दै बहुमत आफूहरूसँग भएकोले पार्टी नफुटेको उहाँको भनाइ छ । पार्टीमा कोही चोइटिए पनि वडा तहसम्म पार्टी सङ्गठित रहेको वरिष्ठ नेता खनालले बताउनुभयो ।

नेकपा दुई पार्टीको एकीकरणबाट बनेको विशिष्ट परिस्थितिमा दुई अध्यक्ष राखिएको भए पनि दुवै अध्यक्ष बराबरी रहेको वरिष्ठ नेता खनालको भनाइ छ । नेता खनालले प्रधानमन्त्री ओलीको गोमन साँपको जस्तो प्रवृत्ति रहेको टिप्पणी पनि गर्नुभयो ।