काठमाण्डाै - सरकारसँग भएको सम्झौताअनुसार भुक्तानी नपाएको उखु किसानले गुनासो गरेका छन् । 

उद्योग, वाणिज्य तथा आपूर्ति मन्त्रालयसँग गएकाे पुस १४ गते चार बुँदे सम्झौता भएपछि आफूहरुले आन्दोलन स्थगित गरेको, तर अझै भुक्तानी नपाएको किसानको भनाइ छ ।

सम्झौता भएको आठ दिन बितिसक्दा समेत भुक्तानी नभएको उखु किसान सङ्घर्ष समिति सर्लाहीका संरक्षक राकेश मिश्रले बताउनुभयो । आन्दोलन गरिरहेको अवधिमा ३३ करोड रुपैयाँ किसानको खातामा आएको तर सम्झौता भएको नौ दिन भइसक्दा पनि किसानको खातामा बाँकी रुपैयाँ नआएको उहाँको भनाइ छ । 

सम्झौता भएको दिनदेखि २१ दिनभित्र सबै बक्यौता रकम भुक्तानी गराउने मन्त्रालयले प्रतिवद्धता जनाएको थियो । किसानको भुक्तानी नदिएका कारण सरकारले उद्योगीको खाता रोक्नुका साथै जग्गा जमिनसमेत रोक्का गरेको छ । 

उद्योगीले यही बहानामा किसानको भुक्तानी नदिएको मिश्रले बताउनुभयो । उद्योग मन्त्रालयले भने किसानको भुक्तानी दिनका लागि खाता रोक्काले कुनै बाधा नहुने जनाएको छ । यो महिनाभित्र पनि भुक्तानी नभए फेरि आन्दोलन गर्ने उखु किसानले चेतावनी दिएका छन् ।