काठमाण्डाै - काठमाण्डाै महानगरपालिकाको कृषि विभागले मल वितरण तथा व्यवस्थापनका लागि सूचीकृत हुने समय एक हप्ता थपेको छ ।

एक महिनाअघि सूचना प्रकाशित हुँदा तीन वटा फार्म सूचीकृत हुन आएको र अरु फार्महरुले पनि इच्छा देखाएकाले फेरि सूचना प्रकाशित गरिएको महानगरपालिकाको कृषि विभागका प्रमुख हरि भण्डारीले जानकारी दिनुभयो । अहिलेसम्म काठमाण्डौको कालीमाटी, माछापोखरी र भद्रकालीमा महानगरपालिकाको कृषि विभागमार्फत रासायनिक मल वितरण भैरहेको छ ।

मल वितरणका लागि इच्छुकहरु विभागमा सूचीकृत भएपछि उनीहरुले मल बेच्न पाउने र महानगरपालिकाको तर्फबाट ढुवानी, व्यवस्थापनलगायतमा छुट पाउने प्रमुख भण्डारीले बताउनुभयो । महानगरपालिकाले सूचीकृत फार्ममार्फत रासायनिक मल बेच्न थालेको हो ।

महानगरपालिकाको कृषि विभागमा सूचीकृत हुनका लागि सहकारी संस्था, फार्म वा संस्था दर्ताको प्रमाणपत्र, दुई आर्थिक वर्षको लेखा परीक्षण प्रतिवेदन, स्थायी लेखा नम्बरको दर्ता प्रमाणपत्र, सम्बन्धित वडाको सिफारिसलगायत कागजात पेस गर्नुपर्नेछ ।