एक महिना उपत्यकासहित ठूला सहरका विद्यालय बन्द गर्न स्वास्थ्य मन्त्रालयकाे सिफारिस

 चैत ३१, २०७७ मंगलबार १४:५५:२८ | उज्यालो सहकर्मी
unn.prixa.net

फाइल फाेटाे

काठमाण्डाै – स्वास्थ्य तथा जनसङ्ख्या मन्त्रालयले काेराेना सङ्क्रमणकाे जाेखिम बढ्दै गएपछि काठमाण्डाै उपत्यकासहित ठूला सहरका विद्यालय कम्तीमा एक महिनाका लागि बन्द गर्न सिफारिस गरेकाे छ । 

मङ्गलवार मन्त्रालयमा पत्रकारहरूसँगकाे कुराकानीमा स्वास्थ्य तथा जनसङ्ख्या मन्त्री हृदयेश त्रिपाठीले कम्तीमा ३० दिन उपत्यकासहित ठूला सहरका विद्यालय बन्द गरी पठनपाठन अनलाइनमार्फत गराउन सिफारिस गरिएकाे बताउनुभयाे । 

मन्त्री त्रिपाठीले अहिलेको नयाँ भाइरस (भेरिएन्ट) युवा र बालबालिकामा पनि देखिएकाले डर लाग्दो रहेको बताउनुभयो ।

‘अहिले बनेका खाेप १८ वर्षभन्दा माथिका लागि मात्रै बनेकाे छ, बालबालिकालाई जाेगाउन चुनाैती थपिएकाे छ, यही भएर काठमाण्डाै उपत्यकासहित ठूला सहरी क्षेत्रका विद्यालय बन्द गर्दै अनलाइन माध्यममा जाने भनेर सिफारिस गरिएकाे हाे’, उहाँले भन्नुभयाे । 

अनलाइनबाट कक्षा सञ्चालन गर्दा सात–आठ लाख विद्यार्थी घरमै रहेर पढ्ने र त्यसले २० प्रतिशत आवतजावतमा कमी आउने देखिएको मन्त्री त्रिपाठीले बताउनुभयाे । 

उहाँका अनुसार विद्यालय बन्द गर्ने विषयमा मन्त्रिपरिषद् बैठकले निर्णय गर्न बाँकी रहेको छ ।  

अन्तिम अपडेट: चैत १५, २०८०

तपाईको प्रतिक्रिया