खोटेहाङ गाउँपालिकामा विद्यावारिधि गर्नेलाई एक लाख ११ हजार १११ छात्रवृत्ति

 बैशाख २१, २०७८ मंगलबार १२:५२:४८ | रासस
unn.prixa.net

खाेटाङ - खाेटाङकाे खोटेहाङ गाउँपालिकाले उच्च शिक्षा अध्ययन गर्ने गाउँपालिकाभित्रका विद्यार्थीलाई छात्रवृत्ति प्रदान गर्ने नीति कार्यान्वयनमा ल्याएको छ ।

एमफिल र पीएचडी गर्ने गाउँपालिकाभित्रका विद्यार्थीलाई प्रोत्साहनस्वरुव छात्रवृत्ति प्रदान गर्ने नीतिअनुसार गाउँपालिकाले वडा नं ६ इन्द्रेणीपोखरीका विष्णुबहादुर कार्कीलाई छात्रवृत्ति स्वरुप एक लाख ११ हजार १११  रुपैयाँ प्रदान गरेको हो । 

गाउँपालिकाको गएकाे असारमा सम्पन्न गाउँसभाले पारित गरेको नीति तथा कार्यक्रमअनुसार एमफिल अध्ययन गर्ने विद्यार्थीलाई छात्रवृत्तिस्वरुप जनही ५५ हजार ५५५ रुपैयाँ र पीएचडी अध्ययन गर्ने विद्यार्थीलाई जनही एक लाख ११ हजार १११ रुपैयाँ प्रदान गर्ने निर्णय गरेको थियो । उच्च शिक्षा हासिल गर्न चाहने गाउँपालिकाभित्रका विद्यार्थीलाई सहयोग र प्रोत्साहन गर्ने उद्देश्यले यसै वर्षबाट छात्रवृत्तिका कार्यक्रम कार्यान्वयनमा ल्याइएको गाउँपालिका प्रमुख प्रदीपकुमार राईले बताउनुभयो । 

पीएचडी र एमफिल गर्ने विद्यार्थी गाउँपालिकाभित्रको स्थायी नागरिक हुनुपर्ने, स्वदेशकै विश्वविद्यालयमा अध्ययनरत हुनुपर्नेलगायतका मापदण्ड तोकिएको छ ।

अन्तिम अपडेट: बैशाख २२, २०७८

तपाईको प्रतिक्रिया