काठमाण्डाै – नेकपा एमालेको विवाद समाधानका लागि बनेको कार्यदलको बैठक अहिले बसिरहेको छ । केहीबेर अघिदेखि सिंहदरबारमा बसिरहेको बैठकमा मिल्न बाँकी रहेका विषयको समाधान खोज्ने प्रयास भइरहेको छ । 

आज दिउँसो केहीबेर बसेको बैठकमा धेरै कुरा मिलिसकेको र केही विषयमा सहमति खोज्न बेलुका फेरि बैठक बस्ने सहमति भएको थियो ।

कार्यदलमा सबै तहका पार्टी र जनसङ्गठनका कमिटीहरू पूर्ववत् अवस्थामा फर्काउने सहमति भएको छ । माओवादी केन्द्र छाडेर आएका नेताहरूको व्यवस्थापन लगायतका विषयमा पनि सहमति जुट्न बाँकी छ ।

प्रधानमन्त्रीसमेत रहनुभएका पार्टी अध्यक्ष ओली र वरिष्ठ नेता नेपालबीच विवाद बढ्दै गएपछि सहमतिका लागि दुवै पक्षका नेताहरू रहेको कार्यदल गठन भएको हो ।  

कार्यदलमा प्रधानमन्त्री एवम् एमाले अध्यक्ष ओली पक्षबाट नेताहरू नेम्वाङ, पौडेल, प्रदीपकुमार ज्ञवाली, शङ्कर पोखरेल, विष्णु रिमाल हुनुहुन्छ भने नेता माधवकुमार नेपाल पक्षबाट रावल, घनश्याम भुसाल, सुरेन्द्र पाण्डे, गोकर्णराज विष्ट र रघुजी पन्त हुनुहुन्छ ।