कर्णालीवासीले जनप्रतिनिधिलाई साेधे– समिति बनाउने मात्रै हाे कि काम पनि गर्नुहुन्छ ?

असोज २, २०७८ शनिबार २०:८:३६ | मुना हमाल

सुर्खेत – कर्णालीका नागरिकहरूले आफ्ना सबालमा केन्द्रित हुन जनप्रतिनिधिहरूलाई सुझाव दिएका छन् । आफूले चुनेर पठाएका जनप्रतिनिधिबाट ठूलो आशा र अपेक्षा भए पनि त्यसअनुसार काम हुन नसकेको भन्दै उनीहरूले गुनासो व्यक्त गरे । संसद् परियोजनाको सहयोगमा आउटलाइन मिडिया प्रालि काठमाण्डौले आज शनिवार सुर्खेतको भेरीगङ्गा नगरपालिकामा आयोजना गरेको ‘हाम्रो संसद्’ कार्यक्रममा सहभागी नागरिकहरूले यस्तो बताएका हुन ।

भेरीगङ्गा १० का वीरबहादुर बस्नेतले सांसहरूलाई सरकारले सञ्चालन गरेका कार्यक्रम नागरिकका लागि कि कार्यकर्ताका लागि पनि हो ? भनेर प्रश्न गर्नुभयो । उहाँले नागरिकले प्रत्यक्ष रूपमा लाभ लिएका छन् कि छैनन् भनेर अनुगमन गर्न आवश्यक रहेको बताउनुभयो । सडक, सिँचाइ, खानेपानी, भवनलगायतका विभिन्न योजना अलपत्र रहेको उहाँको भनाइ छ ।

भेरीगङ्गा १२ की उर्मिला विकले रोजगार, शिक्षा, स्वास्थ्यलगायतका समस्या रहेको बताउनुभयो । उहाँले भन्नुभयो, ‘सरकारले दलित महिला आर्यआर्जन कार्यक्रम ल्याएको छ भनेको छ । खै, हामीले रोजगार पाएको ? हामीले पढेर पनि बेरोजगार भएर बस्नुपर्ने बाध्यता छ ।’

सुर्खेतमा वर्षाैँदेखि बाढी पीडितहरूको समस्या रहेकाले व्यवस्थापनका लागि ध्यान नदिइएको नागरिकहरूले बताए । २०७२ सालका बाढी पीडित अहिले पनि पालमुनि छन् ।

भेरीगङ्गा ४ का विजय दलामी मगरले ६ वर्षदेखि बाढी पीडितको व्यवस्थापन नभएको गुनासो गर्नुभयो । उहाँले प्रदेश सभा सदस्यहरूलाई प्रश्न गर्दै भन्नुभयो, ‘अहिलेसम्म बाढी पीडितहरूको व्यवस्थापन गर्न किन सक्नुभएको छैन ? समितिहरू बनाउने मात्रै हो कि समस्या समाधानतर्फ लाग्नुहुन्छ ? । हामीले पालमुनि कहिलेसम्म बस्ने ? ।’

त्यही ठाउँका सन्तबहादुर खत्रीले आफूहरूको नाम बाढी पीडितको नामावलीमा समेत समावेश नगरेको भन्दै गुनासो व्यक्त गर्नुभयो ।

कार्यक्रममा पूर्वउपसभामुख पुष्पा घर्तीले प्रदेश सभाले सङ्घीयताको जग बसाउने र जनपक्षीय कानुन निर्माणका काम सुरु गरिएको बताउनुभयो । प्रदेश सभा, संसद्का विषयगत समितिले विधेयकबारे छलफल बहस गरेर पास गर्ने गरिएको उहाँको भनाइ छ । पूर्वउपसभामुख घर्तीले सरकारले गरेका कामको अनुगमन गर्ने, निर्देशन दिने, सुझाव दिने गरिएको जानकारी दिनुभयाे । नागरिकका समस्याहरूप्रति सरकारलाई जवाफदेही गराउने काम प्रदेश सभाले गरेको उहाँले बताउनुभयो ।

प्रदेश सभा सदस्य खड्क खत्रीले योजना तथा बजेट दुरुपयोग हुनबाट रोक्न स्थानीयस्तरबाट चनाखो हुनुपर्ने बताए । उहाँले निर्वाचन क्षेत्रमा योजना छनोट गरेर पठाएको जानकारी दिनुभयो । प्रदेश सभा सदस्य खत्रीले जनपक्षीय कानुन निर्माण, संशोधन लगायतमा आफूहरू निरन्तर लाग्ने प्रतिबद्धता जनाउनुभयो । सरकारले नागरिकका लागि भन्दा पनि सरकारमा रहेकाहरूको आसेपासेका लागि कार्यक्रम ल्याउने गरेको पाइएको भन्दै संसदबाट आफूहरूले खबरदारी गरिरहने उहाँको भनाइ थियो ।

प्रदेश सभा सदस्य तथा पूर्वमन्त्री विमला केसीले आफूले सुरु गरेका राम्रा कार्यक्रमलाई अघि बढाउन पहल गर्ने बताउनुभयो । बाढी पीडितहरूको घर बनाउने काम भइरहेको र केहीको व्यवस्थापन भएको उहाँको भनाइ छ ।

प्रदेश सभा सदस्य अमृता शाहीले महिलाका लागि आय आर्जन कार्यक्रमका लागि निरन्तर पहल गरेको बताउनुभयो ।

अन्तिम अपडेट: कात्तिक २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मुना हमाल

मुना हमाल सुर्खेतका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्