बाढी पहिरो तथा डुबान प्रभावित क्षेत्रमा खाद्यान्नलगायत दैनिक उपभोग्य वस्तुको अभाव

कात्तिक ७, २०७८ आइतबार ११:११:५७ | उज्यालो सहकर्मी

काठमाण्डाै - केही दिन अगाडिको लगातारको वर्षाका कारण आएको बाढी पहिरो तथा डुबान प्रभावित क्षेत्रमा खाद्यान्न लगायतका दैनिक उपभोग्य वस्तुको अभाव हुन थालेको छ ।

पानी पर्न छाडेपछि तराईलगायत धेरै ठाउँका प्रभावितको जनजीवन सामान्य बन्दै गएको भए पनि सुदूरपश्चिमका पहाडी जिल्लाका धेरै ठाउँका प्रभावितलाई खाद्यान्न लगायतका दैनिक उपभोग्य वस्तुको समस्या भएको हो ।

पहिरोका कारण सबैभन्दा धेरै प्रभावित भएको बझाङको थलारा गाउँपालिकाका प्रभावितहरुलाई खाद्यान्न, औषधि र खानेपानी लगायतको समस्या भएको थलारा गाउँपालिकाका अध्यक्ष भुवनेश्वर उपाध्यायले जानकारी दिनुभयो । उहाँका अनुसार पहिरोले घर खेत पुरिएकाले खाद्यान्न, लत्ताकपडा लगायतको समस्या भएको छ ।

यो गाउँपालिकामा २३ जनाले ज्यान गुमाएका छन् । उपाध्यायका अनुसार अहिले गाउँपालिकामा १ सय ८० परिवारले स्थानीय त्रिभुवन माध्यमिक विद्यालयमा अस्थायी रुपमा आश्रय लिइरहेका छन् । कतिपय प्रभावितहरु पालमा बसिरहेका छन् । कयौँ परिवार आफन्तकोमा आश्रय लिएर बसिरहेका छन् ।

सदरमुकाम चैनपुर लगायत धेरै ठाउँमा खानेपानी र सञ्चार सेवा पनि बन्द भएकाले समस्या छ । पालिकाहरुले प्रभावितहरुलाई राहत र हराइरहेकाहरुको खोजीलाई तीव्रता दिइरहेको बताएका छन् । पालिकाले सकेसम्म परिवारको सङ्ख्याको आधारमा खाद्यान्न लगायतका राहत वितरणको काम गरिरहेको गाउँपालिकाका अध्यक्ष उपाध्यायले जानकारी दिनुभयो । तर, यो पर्याप्त भने नभएको उहाँको भनाइ छ ।

यस्तै कैलालीको टिकापुर नगरपालिका पनि डुबान प्रभावित नगरपालिका हो । टिकापुर नगरपालिका–५ मा रहेको शाहीपुरमा कर्णाली नदी थुनिएपछि यो पूरै क्षेत्र डुबानमा परेको थियो । अहिले पानीको मात्रा कम भएर जनजीवन सामान्य हुँदै गएको भए पनि अझै धेरै बिचल्लीमा छन् ।

भण्डारण गरिएको खाद्यान्न, लत्ताकपडा लगायतका सामान डुबेर कुहिँदा खाद्यान्न लगायतका सामान जोहो गर्न समस्या भएको छ । लुम्बिनी प्रदेश लगायतका अरु ठाउँमा भने पानी पर्न छोडेपछि जनजीवन सामान्य बन्दै गएको छ ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्