रसुवा – रसुवामा नेपाल विद्युत् प्राधिकरणको विद्युतीय संरचना प्रयोग गर्ने सेवा प्रदायकले सात वर्षदेखि पोल भाडा नतिरेको पाइएको छ । नेपाल विद्युत् प्राधिकरण धुन्चे वितरण केन्द्रका अनुसार प्राधिकरणको विद्युतीय संरचना प्रयोग गर्ने तथा अप्टिकल फाइबर भाडामा लिएर टेलिफोन, इन्टरनेट, केबल टिभी सञ्चालन गर्ने सेवा प्रदायकले २०७२ सालदेखि शुल्क तिरेका छैनन् । 

नेपाल टेलिकमबाहेक अन्यले लामो समयदेखि शुल्क नतिरेका धुन्चे वितरण केन्द्रका प्रशासन प्रमुख एवम् सूचना अधिकारी दीपरमण अधिकारीले बताउनुभयो । यही वैशाखसम्म पनि सम्झौता गर्न नआए केबल लाइनसमेत काटिने उहाँको भनाइ छ । ‘सेवा प्रदायकलाई शुल्क तिर्नका लागि पटक–पटक सूचना जारी गरिएको छ’, उहाँले भन्नुभयो, ‘तर अहलिेसम्म शुल्क बुझाउन आएका छैनन् ।’ 

शुल्क नबुझाउने सबै सेवा प्रदायकको लाइन काट्नका लागि केन्द्रले परिपत्र गरिरहेको र यसको प्रक्रिया अघि बढाइएको उहाँको भनाइ छ । केन्द्रका अनुसार एनसेल, सुबिसु, मर्कन्टाइल, वर्ल्डलिंक, एनआईटीभी स्ट्रेम्स, लाङटाङ केबल नेटवर्क, एभरेष्ट लिंक र बेत्रावती केवलले पोल भाडा नबुझाएका हुन् ।