युक्रेनले रुसी सेनाको कब्जामा पुगेको पूर्वी सहर सेभेरोडोनेत्स्कको एउटा भाग फिर्ता गरेको दाबी गरेको छ । सहरको झन्डै ७० प्रतिशत भूभाग रुसी सेनाको कब्जामा गइसकेकोमा आफ्नाे देशकाे सेनाले सहरको ठूलो हिस्सा फिर्ता गरेको युक्रेनका क्षेत्रीय गभर्नर सर्गी हाइदाईलाई उद्धृत गर्दै बीबीसीले जनाएको छ । 

सहरलाई कब्जा गर्ने रुसी सेनाको प्रयास र रोक्ने युक्रेनी सेनाको प्रयासका बीच अहिले सेभेरोडोनेत्स्कमा युक्रेनी सेना रुसी सेनामाथि दबाब कायम गर्दै पहिले गुमेको भाग फर्काउन सफल भएको हो ।

रुसी सेनाको मुख्य निसाना बनेको सो सहरमा केही हप्तादेखि निरन्तरको गोलाबारी भइरहेको छ । सहरमा अहिले पनि युद्ध चलिरहेको छ । सहरमा मानवीय अवस्था अत्यन्तै दयनीय बनेको गभर्नरलाई उद्धृत गर्दै बीबीसीले जनाएको छ । 

रुसको मुख्य निसानामा रहेको सेभेरोडोनेत्स्क पूरै फिर्ता गर्न अमेरिकाले दिएको नयाँ तोपाखाना निर्णायक हुने पनि गभर्नर हाइदाईले बताउनुभएको छ । 

यसैबीच युक्रेनमा युद्धपछिको पुनर्निर्माणको पहिलो चरण सुरु भएको छ । युक्रेनी प्रधानमन्त्री डेनिस श्म्याहलले देशले द्वन्द्वपछिको पुनर्निर्माणको पहिलो चरण सुरु गरेको जानकारी दिनुभएको समाचार संस्था सिन्ह्वाले जनाएको छ । 

युक्रेनले युद्धका कारण झन्डै सय पुल र २४ हजार किलोमिटर सडक ध्वस्त भएको बताएको छ । आक्रमणमा परेका सहरहरू खण्डहर बनेका छन् ।