बेलायतबाट शरणार्थीलाई रुवान्डा पठाउन लागिएको उडान अन्तिम समयमा रद्द गरिएको छ ।

युरोपेली मानव अधिकार अदालतको हस्तक्षेपपछि बेलायतको समय अनुसार रातको साढे १० बजे हुन लागेको उडान रोकिएको हो ।

यो उडानबाट ७ जनालाई अफ्रिकी देशमा फिर्ता पठाउने अपेक्षा गरिएको थियो । तर अदालतको हस्तक्षेपपछि उडान रोकिएको बीबीसीले जनाएको छ ।

बेलायतका गृहमन्त्री प्रीति पटेलले अदालतको निर्णयका कारण आफू निराश भए पनि विचलित नभएको र अब अर्को उडानको तयारी सुरु हुने बताउनुभएको छ । उहाँले आफ्नो देशको अदालतमा पटक पटक सफलता हासिल गरे पनि युरोपेली अदालतले हस्तक्षेप गरेको टिप्पणी गर्नुभयो ।

युरोपेली मानव अधिकार अदालतले मानव अधिकार कानुनको दायराको निरीक्षण गर्ने गर्छ । यो युरोपेली सङ्घभन्दा भिन्न रहेको संस्था हो । उडान रद्द गर्ने निर्णयलाई कतिपय भने स्वागत गरेका छन् ।