देशका ९५ प्रतिशत नागरिकमा विद्युतको पहुँच : अबको दुई वर्षभित्र सबै नागरिकमा पुर्‍याउने लक्ष्य

भदौ १, २०७९ बुधबार ९:८:० | उज्यालो सहकर्मी

काठमाण्डाै – देशका ९५ प्रतिशत नागरिकमा बिजुली बत्तीको पहुँच पुगेको सरकारले जनाएको छ । उर्जा, जलस्रोत तथा सिँचाइ मन्त्रालयका अनुसार अबको दुई वर्षभित्र सबै नागरिकमा विद्युतको पहुँच पुर्‍याउने गरी काम भैरहेको छ ।

नेपाल विद्युत् प्राधिकरणको ३७ औँ वार्षिकाेत्सवका अवसरमा शुभकामना व्यक्त गर्दै उर्जा मन्त्री पम्फा भुसालले औद्योगिकीकरण, यातायात सञ्चालन, सिँचाइमार्फत कृषि विकास, लिफ्ट मार्फत खानेपानी र सिँचाइ, विद्युतीय सामग्रीको प्रयोग गरी उर्जाको खपत बढाउनुपर्नेमा जोड दिनुभएको छ । उहाँले जलस्रोत र उर्जाको दिगो विकासमार्फत आत्मनिर्भर अर्थतन्त्रको निर्माण गरी समृद्ध नेपाल निर्माणका लागि जुट्न पनि सबै पक्ष र क्षेत्रलाई आह्वान गर्नुभएको छ ।

विद्युत प्रसारण एवं वितरण प्रणालीको विस्तार र गुणस्तर सुधारका लागि उच्च प्राथमिकता दिन मन्त्री भुसालले नेपाल विद्युत् प्राधिकरणलाई आग्रह गर्नुभएको छ । सरकारको नीति अनुसार खाना पकाउने ग्यासलाई विद्युतीय चुलोले विस्थापित गर्ने, विद्युतीय गाडीहरु प्रवर्द्धन गर्ने, सिँचाइमा विद्युतको पहुँच बढाउने र औद्योगिकीकरण गरी रोजगारी सिर्जना गर्ने क्षेत्रमा प्राधिकरणले ध्यान दिनुपर्नेमा पनि उहाँको जोड छ । प्राधिकरणका कार्यकारी निर्देशक कुलमान घिसिङले उर्जा क्षेत्रको विकासमा निजी क्षेत्रलाई प्रोत्साहन गर्ने उदेश्यले प्राधिकरणले निजी क्षेत्रबाट उत्पादित विजुली खरिद गर्दै आएको बताउनुभएको छ । ३७ वर्षको इतिहासमा प्राधिकरणले गएको वर्ष सबैभन्दा धेरै १६ अर्ब १६ करोड ५० लाख खुद मुनाफा आर्जन गर्न सफल भएको पनि उहाँले बताउनुभयो ।

विद्युत् खपतमा भएको वृद्धि, विद्युत् चुहावट नियन्त्रण, प्राधिकरणको विद्युत् गृहबाट उत्पादित विद्युत् परिमाणमा भएको वृद्धि, ४ सय ५६ मेगावाटको माथिल्लो तामाकोशीको सञ्चालन, विद्युत् आयातमा कमी तथा निर्यातमा भएको वृद्धि र खर्च नियन्त्रणलगायतका कारणले मुनाफा आर्जन भएको कार्यकारी निर्देशक घिसिङको भनाई छ ।

पछिल्लो समय विद्युत् उत्पादन बढ्न थालेकाले अब खपत बढाउनुपर्ने र त्यसमा मुख्य गरी औद्योगिक खपत बढाउनेतर्फ जोड दिन आवश्यक रहेको प्राधिकरणका कार्यकारी निर्देशक घिसिङले बताउनुभएको छ ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्