दार्चुला – प्रधानमन्त्री एवम् नेपाली कांग्रेसका सभापति शेरबहादुर देउवाले गठबन्धनले चुनाव जिते दार्चुलाले मन्त्री पाउने आश्वासन दिनुभएकाे छ । 

आज बुधवार दार्चुलाको गोकुलेश्वरमा सत्तारूढ गठबन्धनको चुनावी सभालाई सम्बोधन गर्दै प्रधानमन्त्री देउवाले यस्ताे आश्वासन दिनुभएकाे हाे । उहाँ भन्नुभयाे, ‘गठबन्धन आजको आवश्यकता हाे । गठबन्धनले जिते दार्चुलाले मन्त्री पाउँछ ।’ 

कार्यक्रममा बाेल्दै प्रधानमन्त्री देउवाले मिचिएको नेपाली भूमि कुटनीतिक पहलबाट फिर्ता हुने बताउनुभयाे । महाकाली काेरिडोर, पञ्चेश्वर परियोजनाको काम पनि अगाडि बढाइने उहाँले बताउनुभयाे । 

फरक प्रसङ्गमा प्रधानमन्त्री देउवाले केपी ओलीले आफैँले नक्सा पास गरेको भनेर झुटा बोलिरेहकाे भन्दै सबै दल एक ठाउँमा उभिएर नक्सा पास भएको बताउनुभयाे । ओलीतिर सङ्केत गर्दै उहाँले दार्चुलामा आएर बोल्दैमा आफ्नाे मिचिएकाे भूमि पिर्ता नहुने भएकाले भारतसँग संवाद गर्नुपर्ने बताउनुभयाे । ओलीले आफूले मात्रै जस लिन खोजेको उहाँकाे आराेप थियाे ।