काठमाण्डौ – भोलि हुने मतदानको लागि वसन्तपुरको मतदान स्थल वृद्ध, अशक्त र अपाङ्गमैत्री बनाउने काम सकिएको छ । काठमाण्डौ क्षेत्र नम्बर ८ को १ अन्तर्गत वसन्तपुर नव आदर्श माध्यामिक विद्यालयमा मतदानका लागि बनाइएको मतदान स्थल  कार्य सम्पन्न भएको हो ।

महानगरपालिका वडा नम्बर २३ को एउटा मात्रै मतदान स्थल रहेको वसन्तपुर नव आदर्श माध्यामिक विद्यालयमा ५ वटा मतदान केन्द्रहरु निर्माण गरिएको मतदान अधिकृत चन्द्रबहादुर शिवाकोटीले बताउनु भयो । उहाँले मतदानका लागि रोगी, वृद्धवृद्धा, अशक्त र अपाङ्गता भएका नागरिकहरुको लागि छुट्टै व्यवस्था गरिएको बताउनु भयो । 

उहाँले भन्नुभयो, ‘काठमाण्डौ महानगर वडा नम्बर २३ को एउटा मात्रै मतदान स्थल हो । ५ वटा मतदान केन्द्रहरु छन् । ४ हजार ६२३ जना मतदाताहरु हुनुहुन्छ । सबै चुनावसम्बन्धी काम सकेका छौँ । महिला, पुरुष, अन्य, वृद्ध, अशक्त, अपाङ्गमैत्री मतदान स्थल बनाएका छौँ । उहाँहरुलाई अलग लाइनको व्यवस्था गरेर हामीले काम सकेका छौँ । कर्मचारीलाई आफ्नो कार्य विभाजनसमेत गरिसकेका छौँ।'

मतदान अधिकृत  शिवाकोटीले वसन्तपुर नव आदर्श माध्यामिक विद्यालयमा रहेको मतदान केन्द्रमा भोलिको चुनाव स्वच्छ, निष्पक्ष, भयरहीत र स्वतन्त्र बनाउन कर्मचारीमा कार्य विभाजन गरिसकिएको र सुरक्षाकर्मीहरुलाई पनि खटाइएको बताउनु भयो ।