कास्की – २२ औँ आहा रारा पोखरा गोल्ड कपमा धरान फुटबल क्लबले विजयी सुरुवात गरेकाे छ । आयोजक सहारा क्लबलाई एक–शून्य गाेलले हराउँदै धरानले क्वाटर–फाइनलमा सशस्त्र प्रहरीकाे एपीएफ क्लबसगँको भेट पक्का गरेकाे छ ।

खेलको चौथो मिनेटमा सहाराका भावगत चौधरीले डि–बक्स बाहिर फउल गरेपछि धरानले फ्रि–किकको अवसर प्राप्त गरेकाे थियाे । चौधरीले प्रकाश बुढाथोकीलाई लडाएपछि पाएको फ्रि–किकमा बुढाथोकीले नै गोल गरे । बुढाथाेकी खेलमा 'म्यान अफ दि म्याच' चुनिए । 

प्रतियाेगितामा भाेलि शुक्रवार नेपाल पुलिस क्लब र चर्च ब्याइज युनाइटेड फुटबल क्लबबीच खेल हुने छ ।

सहारा क्लबको आयोजना तथा हिमश्री फुड्स प्रालिको उत्पादन आहा रारा चाउचाउको मुख्य प्रायोजन रहेको गोल्ड कपको उद्घाटन पोखरा महानगरपालिकाका मेयर धनराज आचार्यले गर्नुभयाे । प्रतियोगिताकाे उद्घाटन समारोहमै वर्ष उत्कृष्ट फुटबलरबाट नेपाली राष्ट्रिय फुटबल टोलीका डिफेन्डर अनन्त तामाङलाई सम्मानित गरिएको थियो । उनलाई नगद ५० हजार रुपैयाँसहित सम्मान गरिएकाे थियो । 

प्रतियोगिताकाे विजेताले १२ लाख र उपविजेताले छ लाख रुपैयाँ प्राप्त गर्नेछन् । उत्कृष्ट खेलाडीलाई विद्युतीय स्कुटर प्रदान गरिने छ । उत्कृष्ट पाँच विधालाई सूर्यबहादुर केसी स्मृतिले प्रायोजन गरेको छ ।