चार वटा ट्रक नियन्त्रणमा लिएकोबारे जनक शिक्षाको ध्यानाकर्षण, आपूर्तिकर्तालाई छानबिन गरी दोषी भए कारबाही गरिने

पुष २९, २०७९ शुक्रबार ७:२०:५६ | उज्यालो सहकर्मी

काठमाण्डाै - जनक शिक्षा सामग्री केन्द्र लिमिटेडले चार वटा ट्रक प्रहरीले नियन्त्रणमा लिएकोबारे आएको खबरमा ध्यानाकर्षण भएको जनाएको छ ।

केन्द्रले आज सूचना निकालेर बोलपत्रमार्फत् प्राप्त हुने कागजको नेपाल गुणस्तर तथा नापतौल विभाग, बालाजुमा परीक्षण गरिने, तोकिएको गुणस्तर अनुसारको कागज भएमा मात्र प्रयोग गर्ने, नभएमा कागज आपूर्तिकर्तालाई फिर्ता गर्ने काम नियमित प्रक्रिया भएको जनाएको छ ।

अस्ति बुधवार केन्द्रले फिर्ता गरेको कागज नै आपूर्तिकर्ताले पुनः ल्याएकोबारेमा छानबिन गरी दोषी भएमा कारबाही गर्ने प्रतिबद्धता जनाएको छ । पुस्तक छपाइ गर्न गुणस्तरहीन कागज ल्याएको भन्दै जनक शिक्षा सामग्री केन्द्र लिमिटेडले फिर्ता गरेको कागज सप्लायर्स कम्पनीले पुनः जनक शिक्षामै ल्याएपछि प्रहरीले चार ट्रक कागज नियन्त्रणमा लिएको थियो ।

फिर्ता भएको कागज केन्द्रका पदाधिकारीको मिलेमतोमै पुनः केन्द्रमा आएको खबर सार्वजनिक भएको थियो । यसबारेमा हिजो शिक्षा मन्त्रालयको सहसचिवको टोलीसहित भक्तपुरको मध्यपुरथिमि नगरपालिकाले केन्द्रको अनुगमन गरेर चासो समेत लिएको छ।

केन्द्रका प्रबन्ध निर्देशक अनिलकुमार झाले केन्द्रमा आएको चार ट्रक कागजको गुणस्तर परीक्षण गर्न बाँकी रहेको र यसबारेमा मन्त्रालयसहितलाई छानबिन गर्न आग्रह गर्नुभएको थियो । ललितपुरको नेपाः हिमा ट्रेड लिङ्क प्रालिसँग गएको भदौ २७ गते एक हजार मेट्रिकटन कागज ३० दिनभित्र र थप पाँच मेट्रिकटन गरी कुल एक हजार पाँच मेट्रिकटन कागज आउँदो माघ ४ गतेसम्म ल्याइसक्नुपर्ने सम्झौता गरेको थियो ।

सम्झौता गरेको सप्लायर्सले जनकपुरको एभरेष्ट पेपर मिल्स प्रालिबाट कागज ल्याए पनि गुणस्तरहीन कागज ल्याएको प्रमाणित भएपछि गएको कात्तिक १७ गते फिर्ता गरेको केन्द्रले जनाएको छ । साथै केन्द्रले आउँदो शैक्षिक सत्र २०८० सालको पाठ्यपुस्तक समयमा नै छपाइ गर्ने प्रतिबद्धता समेत जनाएको छ । अहिले केन्द्रले तीन वटा नयाँ रङ्गिन छपाइ गर्ने वेब मेसिन जडान गरेको र कागजको आपूर्ति पनि सहजै भैरहेको हुँदा लक्ष्य अनुसार पाठ्यपुस्तक समयमै विद्यालयमा पुर्याउने जनाएको हो ।

अन्तिम अपडेट: पुस ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्