दाङ छिल्लीकोटवासीलाई अब फोन गर्न डाँडामा उक्लिनु पर्दैन

 फागुन १, २०७९ सोमबार ९:३१:५२ | रासस
unn.prixa.net

फाइल तस्बिर

दाङ - तुलसीपुर–१९ छिल्लीकोटका प्रविर पुनलाई पहिले फोन गर्न डाँडोमा पुग्नुपर्थ्याे । डाँडोमा पुग्दा पनि ‘नेटवर्क’ ले राम्रोसँग काम गर्दैनथ्यो तर अहिले उहाँको मोबाइलमा  ‘फोरजी’ चल्न थालेकाे छ । 

छिल्लीकोटमै बनेको नेपाल टेलिकमकाे टावर सञ्चालनमा आएपछि उहाँको मोबाइलमा  फोरजी चल्न थालेको हो । 'पहिले फोन गर्न नै डाँडोमा पुग्नुपर्थ्याे, प्रविधिको जमाना छ, नेट चलाउन पनि डाँडामै पुग्नु पर्थ्याे', उहाँले भन्नुभयो, 'डाँडोमा पुग्दा पनि राम्रोसँग नेट चल्दैनथ्यो, तर, अहिले यहीको टावर सञ्चालनमा आएपछि घरभित्रैबाट नेट चलाउन पाइएको छ ।' 

त्यस्तै त्यही ठाउँका पूर्ण पुन पनि घरबाटै फोन गर्न पाउँदा निकै खुसी हुनुहुन्छ । उहाँले आफ्नै पहलमा टावर बनेको जनाउँदै टावर निर्माण भएपछि आफूहरुलाई निकै सहज भएको बताउनुभयो । 'मेरै पहलमा टावर निर्माण भएको हो, अहिले यो टावर सञ्चालनमा आएको छ', उहाँले भन्नुभयो, 'टावर सञ्चालनमा आएपछि अहिले घरबाटै फोन गर्न सकिएको छ ।' छिल्लीकोट दाङको पर्यटकीय गन्तव्य पनि हो । त्यही फोनले काम नगर्दा समस्या हुने गरेको थियो । ‘एनसिएल’ले काम गर्ने गरेको भए पनि ‘एनटिसी’ले काम नगर्दा समस्या हुने गरेको थियो ।

अहिले  टावरले ‘टूजी’ र ‘फोरजी’ सेवा प्रदान गर्दै आएको नेपाल टेलिकम तुलसीपुरका प्रमुख तिलक जिसीले बताउनुभयो । टावर सञ्चालन भएसँगै तुलसीपुरको छिल्लीकोटको कुटिचौर, सक्राम, ग्वारखोला आसपास, रोल्पाको रुन्टीगढी, डुब्रिङलगायतका ठाउँ फोन सेवाको पहुँच पुगेको छ ।

लामो समयको प्रयास पछि आइतवार सञ्चार तथा सूचना प्रविधिमन्त्री रेखा शर्माले टावरको शुभारम्भ गर्नुभएको हो । विद्युत् नपुग्दा त्यहाँ लामो समयदेखि टेलिकमको टावर निर्माण भए पनि सञ्चालनमा आउन सकेको थिएन ।  उहाँले टेलिकमको टावर नपुग्ने ठाउँमा टावर पुर्याएर सञ्चारको पहुँचमा हरेक नागरिकलाई ल्याउने बताउनुभयो । 'अहिले पनि दाङको नाका क्षेत्र, विकट क्षेत्रमा अझै फोन सेवा सहज हुन सकेको छैन', उहाँले भन्नुभयो, 'ती ठाउँमा टावर पुर्याउने मेरो पहिलो काम हुनेछ ।'

उहाँले ‘हाइवे’ क्षेत्रमा पनि नेटवर्कको समस्या हुँदा दुर्घटना भएको बेला उद्धारमा समस्या हुने गरेको जनाउँदै तत्काल हाइवेमा फोन सेवाको व्यवस्था मिलाउन  टेलिकम कार्यालय प्रमुखलाई निर्देशन दिइसकेको बताउनुभयो ।

सञ्चार तथा सूचना प्रविधिमन्त्री  शर्माले केही छिट्टै दाङको सैघामा निर्माण भएको टेलिकमको टावर पनि सञ्चालनमा ल्याइने  जानकारी दिनुभयो । त्यहाँ टावर सञ्चालनमा आएपछि बङ्गलाचुलीलगायतका क्षेत्रमा सहज सञ्चारको पहुँच हुने बताइएको छ ।

टेलिकमले छिल्लीकोटसहितका क्षेत्रमा निःशुल्क सिम वितरण गरेको छ । प्रमुख जिसीका अनुसार नयाँ टावर निर्माण भएको स्थानमा नमस्तेको निःशुल्क सिम वितरण गरिएको हो । प्रत्येक नयाँ टावर निर्माण भएको ठाउँमा पाँच सय नयाँ सिम वितरण गरिने र आवश्यकताअनुसार सिम थप गर्न सकिने उहाँले बताउनुभयो । 

अन्तिम अपडेट: चैत १५, २०८०

तपाईको प्रतिक्रिया