सुर्खेत – कर्णाली प्रदेश सरकारले आउँदो आर्थिक वर्ष २०८०/८१ का लागि ३३ अर्ब ३७ करोड ९७ लाख सात हजार रुपैयाँको बजेट सार्वजनिक गरेको छ ।

प्रदेशका आन्तरिक मामिला तथा योजनामन्त्री वेदराज सिंहले शुक्रवार प्रदेश सभा बैठकमा सरकारकाे बजेट सार्वजनिक गर्नुभएको हो ।

चालुतर्फ नाै अर्ब २० लाख २४ हजार र पुँजीगततर्फ १९ अर्ब ९७ करोड ७२ लाख ४३ हजार रुपैयाँ बजेट विनियोजन गरिएको छ । बजेटमा पालिकाकाे वित्तीय हस्तान्तरणतर्फ चार अर्ब ८० करोड चार लाख ४० हजार रुपैयाँ विनियोजन गरिएको छ । चालु आर्थिक वर्षमा कर्णालीको बजेट ३२ अर्ब ७४ करोड नाै लाख रुपैयाँको थियो ।

बजेटमा ‘नदीमाथिका गरा : बनाउँछौँ हराभरा’ लाई कार्यरूप दिन कर्णाली, भेरी बेसिन र शारदालगायतका विभिन्न नदी किनारमा रहेका टारहरूमा सिँचाइ सुविधा विस्तार गर्न एक करोड ४० लाख रुपैयाँ विनियोजन गरिएको छ । प्रदेशको खाद्यान्न उत्पादनको प्रचुर सम्भावना रहेका क्षेत्रहरूको विकास गर्न सङ्घीय सरकार तथा विकास साझेदार संस्थासँग सहकार्य गरिने बजेट वक्तव्यमा उल्लेख छ ।