काठमाण्डाै – सत्तारूढ प्रमुख घटक नेकपा (एमाले) का अध्यक्ष केपी शर्मा ओलीले आफूलाई प्रधानमन्त्रीको इच्छा नभएको बताउनुभएको छ ।

आज बुधवार प्रतिनिधि सभा बैठकमा अध्यक्ष ओलीले प्रधानमन्त्री पुष्पकमल दाहाल प्रचण्ड, आफू र नेकपा एकीकृत समाजवादीका अध्यक्ष माधवकुमार नेपालबीच प्रधानमन्त्री पद १५/१५ महिनाका लागि बाँडफाँट गरेको समाचार आएकोमा आपत्ति जनाउँदै आफूलाई प्रधानमन्त्री बन्ने इच्छा नरहेको बताउनुभएको हो । देश र नागरिकका लागि केही गराैँ भनेर आफूहरूले नयाँ सत्ता समीकरण बनाएकाे उहाँले जिकिर गर्नुभयो ।

उहाँले भन्नुभयो, ‘प्रधानमन्त्री हुनकै लागि हामीले नयाँ सत्ता समीकरण बनाएकाे होइन । मलाई प्रधानमन्त्रीको इच्छा पनि छैन । यो देशमा केही गरौँ भनेर नयाँ सत्ता समीकरण बनाएकाे हाे ।’

ओलीले देशमा केही गरौँ भनेर आफूले नेपाली कांग्रेससँग पनि पटक–पटक प्रस्ताव गरेको उल्लेख गर्नुभयाे ।