राष्ट्रिय स्वतन्त्र पार्टीको चुनावी घोषणापत्रमा रोजगारी : बाध्यतावश देश छाड्न पर्दैन

कात्तिक १७, २०७९ बिहीबार १४:३९:८ | उज्यालो सहकर्मी

काठमाण्डौ – राष्ट्रिय स्वतन्त्र पार्टीले बिहीबार सार्वजनिक गरेका आफ्नो घोषणापत्रमा रोजगारीका लागि बाध्यतावश देश छोड्न नपर्ने समाजको परिकल्पना गरेको छ ।

रवि लामिछाने नेतृत्वकाे राष्ट्रिय स्वतन्त्र पार्टीले आउँदो मङ्सिर ४ गते हुने चुनावका लागि बिहीबार आफ्नो चुनावी बाचा सार्वजनिक गर्दै ऋण उपलब्धता सहज बनाएर उद्यमशीलता प्रवर्द्धन गर्न विदेशबाट फर्केका नेपालीका लागि सबै वित्तीय संस्थाहरूले लगानी योग्य रकमको ५ प्रतिशत अनिवार्य रूपमा छुट्टाउन पर्ने व्यवस्था गर्ने बताएको छ ।

यस्तै प्रारम्भिक शेयरहरूमा लगानी गरेर भविष्यका लागि रकम बचत गर्ने विशेष अवसर स्वरूप विदेशमा रहेरै लगानी गर्ने नेपाली नागरिकका लागि १५ प्रतिशत शेयर अनिवार्य छुट्टाउने, विभिन्न देशहरूमा दक्षतामा आधारित सुरक्षित र उच्च पारिश्रमिक पाउने रोजगारीको खोजी गरिने कुरा पनि चुनावी बाचामा समावेश छ ।

वैदेशिक रोजगारीमा जान खोज्ने नेपालीको खर्चलाई न्यूनीकरण गर्दै निःशुल्क बनाउन सरकारले नै काम मिलाइदिने मञ्चको स्थापना गर्ने र भाषा सिक्न, अधिकारका बारेमा जानकारी लिन सक्ने एक बिन्दु सेवा सञ्चालन गर्ने र विदेशमा समस्यामा पर्दा श्रमिकले सम्पर्क गर्न सक्ने र उनीहरूको समस्या समाधानका लागि हटलाइन र द्रुत सहयोगका लागि एकीकृत संरचना बनाएर कूटनीतिक तहबाट अधिकार संरक्षण गर्ने कुरा घोषणापत्रमा गरिएको छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)