काठमाण्डाै – मोरङमा बूढी खोलाले बगाएर एक जनाको ज्यान गएको छ । यस्तै दुई जना बेपत्ता भएका छन् ।

मोरङको सुन्दरहरैँचा नगरपालिका वडा नम्बर ४ गौशला नजिकै बूढी खोलामा माछा मार्ने क्रममा अघि दिउँसो चार जनालाई बाढीले बगाएको थियो । बाढीले बगाएकामध्ये सुन्दरहरैँचा–४ की प्रेमकला चौधरीको शव भेटिएको मोरङका प्रहरी प्रमुख, प्रहरी उपरीक्षक (एसपी) नवराज कार्कीले उज्यालोलाई जानकारी दिनुभयो ।

यस्तै ६० वर्षकी असरादेवी चौधरी र ३० वर्षकी फूला चौधरी बेपत्ता भएका र उनीहरूको खोजी भइरहेको एसपी कार्कीले बताउनुभएको छ । बाढी बगाएकी ३० वर्षकी स्वस्तिका चौधरीको भने उद्धार भएको छ ।

झापा, मोरङ, सुनसरीलगायतका जिल्लामा गए रातिदेखि ठूलो पानी परिरहेको छ । चतरामा १२ घण्टामा १ सय ६५ मिलिमिटर पानी परेको छ । बाढी सूचना केन्द्रले मोरङको बूढी खोलाको बाढीले सतर्कता तह पार गरेको भन्दै चेतावनी पनि जारी गरेको छ ।