काठमाण्डौ – बाढी पहिरोका कारण देशका विभिन्न ४२ ठाउँका सडकमा क्षति पुगेको छ । सडक विभागका अनुसार बाढी पहिरोले अवरुद्ध भएकामध्ये २० ठाउँमा दुईतर्फी नै खुलिसकेको छ । १८ वटा ठाउँमा एकतर्फी रुपमा सञ्चालनमा आएको छ भने चार ठाउँको सडक अझै अवरुद्ध छ । पुष्पलाल मध्य पहाडी राजमार्ग अन्तर्गत पाँचथरको रिजाल भिर र सेरेजामा असार २ गतेदेखि नै सडक अवरुद्ध छ ।

यस्तै कोशी राजमार्ग अन्तर्गत संखुवासभाको समाटारमा असार ६ गतेदेखि र तमोर करिडोरमा पर्ने मोरङको चतरा बराह क्षेत्रमा असार १२ गतेदेखि सडक अवरुद्ध भएको छ । अवरुद्ध सडक खुलाउने प्रयास भइरहेको सडक विभागले जनाएको छ ।

नारायणगढ–मुग्लिन सडक पनि वर्षाका कारण पहिरो खसेर पटक–पटक अवरुद्ध हुँदै आएको छ । हिजो दिउँसो पनि इच्छाकामना गाउँपालिका–६ जलबिरेमा पहिरो खसेपछि केही समय सडक अवरुद्ध भएको थियो । राजमार्गसँग जोडिएका सहायक मार्ग बढी विस्तार भएको र ती सडकमा पानी परेपछि पहिरो खसेर सडकमा क्षति पुग्ने गरेको छ ।

सडक अवरुद्ध भएको सूचना आउनेबित्तिकै खुलाउनका लागि आवश्यक जनशक्ति र मेसिन स्थानीय प्रशासनसँगको समन्वयमा परिचालन गर्ने गरिएको विभागले जनाएको छ । नारायणगढ–मुग्लिन सडकमा पहिरो पन्छाउन दुई ठाउँमा उपकरण तयारी अवस्थामा राखिएको छ ।

डिभिजन सडक कार्यालय भरतपुरका प्रमुख रमेशप्रसाद पौडेलका अनुसार मुग्लिनबाट पाँच किलोमिटर नारायणगढतर्फ पाँच किलो भन्ने ठाउँमा लोडर तयारी अवस्थामा राखिएको छ । नारायणगढबाट २१ किलोमिटर मुग्लिनतर्फ मौरी पुलमा स्काभेटर र लोडर राखिएको छ । यो सडकखण्ड ३६ किलोमिटर लामो छ ।

सडक कार्यालयले गरेको अध्ययन अनुसार यो सडकको २५ ठाउँ पहिरोको जोखिममा छन् । तीमध्ये चार स्थान उच्च र सात ठाउँ कम जोखिममा छन् । मौरी पुल, नाम्सी पुल, कालीखोला र तुइन पुल क्षेत्र पहिरोको उच्च जोखिममा छ ।