काठमाण्डौ – अमेरिका निवासी सानुबाबु सिलवालद्वारा लिखित 'सपना र यथार्थमा अमेरिका' नामक कृतिको विमोचन भएको छ । काठमाण्डौमा आयोजित एक कार्यक्रममा मन्त्रिपरिषद्का पूर्वअध्यक्ष खिलराज रेग्मीले कृतिको विमोचन गर्नुभएको हो ।

उहाँले मुलुकको विकास र आर्थिक समृद्धिका लागि सबै राजनीतिक दलहरुबीच साझा दृष्टिकोण आवश्यक भएको बताउनुभयो । अमेरिकालाई जुन दृष्टिकोणबाट हेरिए पनि विधिको शासन, मूल्य प्रणालीको अवसर देश  भएको भन्दै त्यहाँको समुन्नत र समृद्ध विकासलाई नेपालले आत्मसात् गर्न सक्नुपर्ने मन्त्रिपरिषद्का पूर्वअध्यक्ष रेग्मीको भनाइ छ ।

प्राध्यापक डा. सुरेन्द्र केसीले मुलुक निर्माणमा चेतनशील आम युवा सक्रिय हुन जरुरी रहेको भन्दै विमोचित कृतिले अमेरिकी जीवनको वास्तविकता, अवसर र सङ्घर्षलाई समेटेको बताउनुभयो ।

राजनीतिक विश्लेषक पुरुषोत्तम दाहालले अमेरिका पुग्ने युवाको मोह, सङ्घर्ष र सफलताका तमाम विषयलाई पुस्तकले उल्लेख गरेको बताउनुभयो । वरिष्ठ पत्रकार देवप्रकाश त्रिपाठीले सबै नेपाली युवाले पढ्नैपर्ने उपयोगी पुस्तक बजारमा आएको बताउनुभयो ।

वरिष्ठ पत्रकार तारा बरालले अमेरिकी समाज, आप्रवासीका समस्या, विधिको शासन, विकास र प्रविधि, रोजगारीको अवसरलगायत विषयलाई पुस्तकले समेटेको बताउनुभयो ।

पुस्तकका लेखक सिलवालले प्रवासी जीवनका सङ्घर्ष र सफलताका कथालाई पुस्तकमा उजागर गरेको बताउनुभयो ।