काठमाण्डौ – मुग्लिन–मलेखु सडकखण्ड अन्तर्गत फिस्लिङमा गएरातिदेखि अवरुद्ध सडक खुलेको छ । तर मुग्लिन–नारायणगढ सडकखण्ड अन्तर्गत कालीखोलामा भने अझै पहिरो पन्छाउन सकिएको छैन । पहिरो ठूलो भएकाले सडक खुल्न समय लाग्ने मुग्लिन प्रहरीले जनाएको छ ।

यस्तै तनहुँका विभिन्न ठाउँमा पहिरो खस्दा पृथ्वी राजमार्ग अवरुद्ध भएको छ । तनहुँको बन्दीपुर गाउँपालिका–५ याम्पामा, व्यास नगरपालिका–१२ घाँसीकुवा, म्याग्दे गाउँपालिका–६ मौरीओडारमा आज बिहान पहिरो खस्दा राजमार्ग अवरुद्ध भएको छ ।

प्रहरीले देशका विभिन्न सडक अवरोध भइरहेकाले बुझेरमात्रै लामो यात्रामा निस्किन अनुरोध गरेको छ । अवरोध नभएका राजमार्गमा पनि यातायात चापका कारण जाम हुने गरेकाले सकेसम्म यस्तो अवस्थामा यात्रा नगर्न र यात्रा गरिहाले पनि जानकारी लिएर मात्रै निस्किन प्रहरीले भनेको छ ।

आज गण्डकी, बाग्मती र लुम्बिनी प्रदेशमा अति जरुरी बाहेक लामो यात्रामा ननिस्कन प्रहरीले अनुरोध गरेको छ ।