काठमाण्डौ – बितेका दुई हप्तादेखि कष्टपूर्ण भइरहेको सडक यात्राकाबीच हिजो दुई वटा बस त्रिशूलीमा खसेपछि यात्रा सुरक्षाबारे चिन्ता बढेको छ । सडक विभागकाअनुसार मनसुन भित्रिएलगत्तै विभिन्न सडकहरुमा अबरोध शुरु भएको हो ।

मनसुन भित्रिए यता बाढीपहिरोले दुई सय ५८ वटा सडकमा क्षति पुगेको छ । तीमध्ये एक सय २० वटा सडक सञ्चालनमा आएका छन् । त्यस्तै, एक सय २२ वटा सडक एकतर्फी मात्रै सञ्चालन भइरहेका छन् भने १६ वटा अवरुद्ध छन् । यी राजमार्ग अन्तर्गत बाहेका अरु ग्रामिण सडकहरुको अबस्था झनै कष्टपूर्ण छ ।

राजमार्गहरुमा अवरोध पन्छाउन चाँडै प्रयास हुने भए पनि अन्य सडकमा लामो समय अबरोध रहन्छ । बाढी र पहिरोका कारण यात्रा जोखिमपूर्ण छ भने अबरोध हुँदा घण्टौँसम्म सडकमै बस्नुपर्छ । भू–विपद् विशेषज्ञ रञ्जनकुमार दाहाल नारायणगढ–मुग्लिन लगायतका धेरै सडक पर्याप्त भौगोलिक अध्ययन नगरी बनाएका कारण जोखिमपूर्ण रहेको बताउनुहुन्छ ।

भीर काटेर बनाइएका सडकमा जोखिम हुने भएकोले अत्यधिक पानी परेको बेला सडक बन्द गर्नु उचित हुने उहाँको सुझाव छ । अत्यधिक पानी पर्दा के–कस्तो समस्या आउँछ भन्ने विषयमा दाहालले अध्ययन पनि गर्नुभएको छ । सामाजिक सञ्जालमा लेख्दै उहाँले एक घण्टामा एक सय ५० मिलिमिटर भन्दा बढी पानी परेमा मुग्लिन–नारायणगढ सडक बन्द गर्नुपर्ने बताउनुभयो ।