काठमाण्डौ – त्रिशूली रिभरसाइड रिसोर्टको कायक टिम नारायणगढ–मुग्लिन सडक खण्डको सिमलतालमा पहिरोले बगाएको दुई वटा बस र यात्रुको खोजी तथा उद्धार कार्यका लागि जुटेको छ । साहसिक खेल मात्र नभइ उद्धार कार्यमासमेत खटिने भएकाले कायकलाई रिभर एम्बुलेन्ससमेत भनिन्छ ।

भरतपुर महानगरपालिका–२९ सिमलतालमा शुक्रवार बिहान झन्डै ३ बजे लेदोसहितको पहिरोमा दुई यात्रुबाहक बस बग्दा बस र कम्तीमा ४८ जना यात्रु बेपत्ता भएका छन् । जसको खोजीका लागि सरकारी तथा गैरसरकारी टोली खटिएका छन् ।

बेपत्ता बस तथा यात्रुको खोजी कार्यका लागि मलेखुको रिभरसाइड रिसोर्टबाट पाँच वटा कायाकसहित छ गाइडको समूह बस खोजी कार्यका लागि खटिएको छ । सिमलतालबाट गाइघाटसम्म नदीको दायाँबायाँ कायकिङ गर्दै खोजी कार्य भइरहेको रिसोर्ट सञ्चालक उद्दव कँडेलले बताउनुभयो ।