भारतको मणिपुरमा पूर्वमुख्यमन्त्रीको घरमा रकेट आक्रमणपछि पुनः ह...
भदौ २२, २०८१ शनिबार
काठमाण्डाै – बाग्मती प्रदेशका मुख्यमन्त्री शालिकराम जम्कट्टेल र लुम्बिनी प्रदेशका मुख्यमन्त्री जोखबहादुर महराले राजीनामा दिनुभएको छ ।
बाग्मतीको प्रदेश सभाकाे आजकाे बैठकलाई सम्बोधन गर्दै जम्कट्टेलले राजीनामा दिनुभएको हो । साझेदार दल नेकपा एमालेले समर्थन फिर्ता लिएसँगै जम्कट्टेल अल्पमतमा पर्नुभएको थियो । लुम्बिनीमा अब एमाले र नेपाली कांग्रेस मिलेर सरकार बनाउनेछन् ।
नेपाली कांग्रेसले बाग्मती प्रदेशको मुख्यमन्त्रीमा नुवाकोटका सांसद बहादुरसिंह लामालाई अघि सार्ने निर्णय गरेको छ । आज बिहान मकवानपुरकाे हेटौँडामा बसेको नेपाली कांग्रेस बाग्मती प्रदेश संसदीय दलको बैठकले मुख्यमन्त्रीका लागि संसदीय दलका नेतासमेत रहेका लामालाई अघि सार्ने सर्वसम्मत निर्णय गरेको हो । मुख्यमन्त्री शालिकराम जम्कट्टेलले आज विश्वासको मत लिने कार्यसूची रहेकाेमा आफ्नाे पक्षमा बहुमत नपुग्ने निश्चित भएपछि उहाँले राजीनामा दिनुभएकाे छ ।
एमाले र कांग्रेसको सहमतिअनुसार बाग्मतीको मुख्यमन्त्री नेपाली कांग्रेसले पाउनेछ । त्यसैले अब बाग्मतीको मुख्यमन्त्रीमा बहादुरसिंह लामा नियुक्त हुने पक्का पक्की जस्तै छ । कांग्रेसका लामाले एमालेसमेतको समर्थनमा आज नै मुख्यमन्त्रीको दाबी पेश गर्ने तयारी गर्नुभएको छ ।
यस्तै लुम्बिनीका मुख्यमन्त्री जोखबहाखुर महराले पनि राजीनामाको घोषणा गर्नुभएको हो । विश्वासको मतका लागि डाकिएको बैठकमा महराले राजीनामाको घोषणा गर्नुभएको हो । उहाँले केन्द्रमा समीकरण फेरिएपछि प्रदेशमा पनि सत्ता फेरबदल भएको बताउनुभयो ।
सहमतिअनुसार अब लुम्बिनीको मुख्यमन्त्री एमाले संसदीय दलका नेता लीला गिरी बन्नुहुनेभएको छ । लुम्बिनीमा एमाले–कांग्रेसको समीकरणअनुसार सहज बहुमत जुट्ने छ ।
उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।