काठमाण्डौ – काभ्रेको बनेपाका मुकेश कायस्थको परिवारले एक वर्षपछि राज्यबाट सुविधा पाउने भएको छ । दोस्रो जनआन्दोलनमा घाइते भएर १७ वर्षसम्म अर्धचेत रहेका बनेपा नगरपालिका–८ का ३२ वर्षीय मुकेशको उपचारकाक्रममा अघिल्लो वर्ष वैशाख २७ गते निधन भएको थियो ।

निधनपछि २०८० साल जेठ २ गते मुकेशलाई तत्कालीन सरकारले शहीद घोषणा गरेको थियो । तर मुकेशको परिवारले सरकारबाट पाउने सुविधा पाउन सकेको थिएन । मुकेशको परिवारले गृहमन्त्री रमेश लेखकलाई भेटी आफूले राज्यबाट पाउनुपर्ने सुविधाबाट बञ्चित भएकोबारे जानकारी गराएपछि सरकारको तर्फबाट शहीदले पाउनेसरह सबै सुविधा उहाँको परिवारले पाउने भएका हुन् ।

जनआन्दोलनका क्रममा २०६२ चैत २७ गते १५ वर्षका मुकेश बनेपाको तीनदोबाटोमा सुरक्षाकर्मीको गोली लागेर गम्भीर घाइते हुनुभएको थियो । त्यस दिनदेखि उहाँको होस् खुल्न सकेको थिएन ।