काठमाण्डाै – बाढीका कारण महोत्तरीको बर्दिबास नगरपालिका–५ माईस्थान जङ्गल क्षेत्रमा पर्ने बेलगाछी पुलमा क्षति पुगेपछि पूर्व–पश्चिम राजमार्ग अवरुद्ध भएको छ । सडक अवरुद्ध हुँदा यात्रु समस्यामा परेका छन् ।

जिल्ला प्रहरी कार्यालय महोत्तरीका अनुसार बेलगाछी (ढुङ्ग्रे खोला) पुलसँग जोडिएको दक्षिणतिरको सडकको ५–६ फिट भाग भत्किएको छ । सडकमा क्षति पुगेपछि रातिदेखि नै यातायात ठप्प छ । क्षति भएको ठाउँमा मर्मतको काम भइरहेको प्रहरीले जनाएको छ ।

राजमार्गमा क्षति पुगेपछि माईस्थान चोकबाट डाइभर्सन गरिएको छ । माईस्थान चोकबाट गौशाला रोड हुँदै हुलाकी सडकमा निस्किएर कान्तिबजार, लक्ष्मीनियाँ हुँदै पुनः पूर्व–पश्चिम राजमार्गमा निस्किने गरी व्यवस्था मिलाइएको महोत्तरी प्रहरीले जनाएको छ ।

तस्बिर : सुनिलकुमार साहकाे फेसबुकबाट