काठमाण्डाै – नेपाल उद्योग वाणिज्य महासङ्घले उद्योगहरूलाई सस्तोमा बिजुली उपलब्ध गराउन सरकारसँग माग गरेको छ ।

नेपाल उद्योग वाणिज्य महासङ्घले आज काठमाण्डौमा आयोजना गरेको कार्यक्रममा बोल्दै महासङ्घका अध्यक्ष चन्द्रप्रसाद ढकालले बिजुलीलाई कच्चा पदार्थको रूपमा सस्तोमा उपलब्ध गराउन सरकारसँग माग गर्नुभएको हो । उहाँले साना तथा मझौला उद्योग सञ्चालनका लागि सहयोग आवश्यक रहेकाले त्यसमा पनि सरकारले विशेष ध्यान दिनुपर्ने बताउनुभयो ।

अध्यक्ष ढकालले स्टार्ट अप परियोजनालाई कर्जा प्रवाह परियोजनाका रूपमा अघि बढाउने प्रधानमन्त्री केपी शर्मा ओलीको भनाइले पनि देशमा आर्थिक गतिविधिलाई अघि बढाउन महत्त्वपूर्ण टेवा पुग्ने विश्वास व्यक्त गर्नुभयो । उहाँले कच्चा पदार्थ आयातमा अझै सहुलियतको व्यवस्था गर्न पनि सरकारको ध्यानाकर्षण गराउनुभयो ।