अर्घाखाँची – लुम्बिनी प्रदेशका मुख्यमन्त्री चेतनारायण आचार्यले सरकारी कार्यालयबाट हुने सेवा प्रवाह कानुनी गाठो बल्झाएर नभइ निकास दिएर प्रवाह गर्न कर्मचारीलाई निर्देशन दिनुभएको छ । उहाँले कर्मचारीलाई छिटो, छरितो र सेवाग्राहीमुखी बनाउन निर्देशन समेत दिनुभएको छ ।

निजामती सेवा दिवसको अवसरमा अर्घाखाँचीको सन्धिखर्कमा भएको कार्यक्रममा मुख्यमन्त्री आचार्यले कर्मचारीहरुले हुने कामलाइ पनि कानूनका नाममा अनेक दुःख दिने परम्परालाइ अन्त्य गर्न आग्रह गर्नुभयो । अहिले कर्मचारीलाइ समाजले हेर्ने जुन दृष्टीकोण छ, त्यो दृष्टीकोणमा परिवर्तनका लागि कर्मचारीले गर्ने कामबाटै पुष्टि गर्नुपर्नेमा उहाँको जोड छ ।

उहाँले लुम्बिनी प्रदेश सरकारले छिट्टै विभिन्न तहमा एक हजार नौ सय कर्मचारीको  विज्ञापन खोल्ने बताउनुभयो । स्वीकृती दरवन्दीअनुसार लुम्बिनी प्रदेश सरकार मातहत रहेका कार्यालयमा ४ हजार ७८ जना कर्मचारीको दरवन्दी रहेकोमा अहिले २१ सय ७८ जना कर्मचारी मात्र कार्यरत रहेको र रिक्त रहेका १९ सय कर्मचारीको पदमा अब छिट्टै लोक सेवा आयोगमार्फत विज्ञापन खोलिने उहाँले बताउनुभयो ।