काठमाण्डौ – नेकपा (माओवादी केन्द्र) का अध्यक्ष एवम् पूर्वप्रधानमन्त्री पुष्पकमल दाहालले पछिल्लो पटक प्रधानमन्त्री हुँदा गर्व गर्न लायक काम जनयुद्धका शहीदहरुलाई राष्ट्रिय शहीदको रुपमा आधिकारिक र औपचारिक घोषणा गर्नु रहेको बताउनुभएको छ ।

पार्टी केन्दीय कार्यालय पेरिस डाँडामा आयोजित कार्यक्रममा बोल्दै उहाँले १५/१६ वर्ष अगाडिदेखि सिंहदरबारमा थन्किएको विषयलाई आधिकारिता दिने काम गरेको बताउनु भयो ।

यस्तै उहाँले जनयुद्ध दिवसलाई राष्ट्रिय दिवसको घोषणा र बिदा दिने निर्णय गर्नु पनि गर्व गर्न लायक विषय भएको बताउनु भयो । जनयुद्ध दिवस मनाउने कुरामा अदालतले रोक लगाएको भन्दै यसको विरोधमा आवाज उठाउन उहाँले कार्यकर्तालाई निर्देशन दिनुभयो ।

उहाँले आफू नेतृत्वको सरकार नभएको भए कल्पनामा मात्रै सिमित हुने बताउनु भयो । उहाँले आफू प्रधानमन्त्रीमा रहँदै सङ्क्रमणकालीन न्यायसँग सम्बन्धित विधेयकलाई अन्तिम रुप दिने कामका लागि कार्यदलको गठन गरेको र अहिले सफल भएको दाबी गर्नुभयो । अध्यक्ष दाहालले माओवादी नेताहरुको मुद्दा सबैका एउटै भएकाले एक ठाउँमा आउनुको विकल्प नरहेको बताउनु भयो ।