काठमाण्डाै – प्रधानमन्त्री केपी शर्मा ओली संयुक्त राष्ट्रसङ्घको ७९औं महासभामा सहभागी भई आज दिउँसो स्वदेश फर्कनुभएको छ ।

प्रधानमन्त्री ओलीको स्वागतका लागि सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, उपप्रधानमन्त्रीद्वय विष्णुप्रसाद पौडेल र प्रकाशमान सिंह त्रिभुवन अन्तर्राष्ट्रिय विमानस्थल पुग्नुभएको थियो । त्यस अवसरमा नेपाली सेनाको एक टुकडीले प्रधानमन्त्री ओलीलाई सम्मान गारत अर्पण गरेको थियो ।

प्रधानमन्त्री ओली राष्ट्रसङ्घको महासभामा भाग लिन यही असोज ४ गते नेपाली प्रतिनिधिमण्डलको नेतृत्व गर्दै अमेरिकाको न्युयोर्क जानुभएको थियो । उहाँले महासभालाई यही असोज १० गते सम्बोधन गर्नुभएको थियो ।

भ्रमण टोलीमा प्रधानमन्त्रीका साथमा उहाँकी श्रीमती राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका प्रमुख सल्लाहकार विष्णुप्रसाद रिमाल, परराष्ट्रसचिव सेवा लम्साललगायत थिए ।