एउटा परिवारै सखाप पार्ने गरी भएको आगलागी सुनियोजित भएको आफन्तको दावी

मंसिर १३, २०७५ बिहीबार २०:९:४ | सुश्मा राजवंशी

झापा – शिवसताक्षि नगरपालिका –७, लालझोडामा आइतबार राति साढे १० बजेको समयमा भएको आगलागीले एउटा परिवार नै सखाप पार्यो ।

३४ वर्षीय लक्षमण खनाल, उनकी श्रीमती २८ वर्षीया राधिका खनाल, ४ वर्षीया छोरी चन्द्रा र ५ महिने नाबालक छोरा टीकारामको सुतिरहेकै अवस्थामा जलेर मृत्यु भयो ।

लालझोडामा रहेको घर जलेर खरानी भएको अनि आफ्ना छोराबुहारी नातिनातिनालाई त्यो आगोले खाएको ५ दिन पुगिसक्यो । तर मृतक लक्ष्मणका बुवाआमाका मनमा भने आगो बलिरहेको छ । लक्ष्मणकी आमा भावविह्वल हुनुहुन्छ । आँखाबाट आँसु रोकिएको छैन । काजकिरियामा बसेका बुवा रामकृष्ण खनाल आफ्नो छोरोको परिवारै सखाप हुने गरी भएको आगलागीको घटाना नियोजित भएको बताउँदै न्यायका लागि सरकासँग माग गरिरहनु भएको छ ।

‘आधा घण्टा मात्र भएको थियो छोरा लक्ष्मण र ४ वर्षीया नातिनी चन्द्रासँग मोबाइलमा कुराकानी भएको । एक्कासि फोन आयो छोरा लक्ष्मण खनालको घरमा आगलागी भो रे भन्ने खबर पाएँ, काइँला छोरासँग बाइकमा पुग्दा कान्छो छोरोको घर पुरै जलेर नष्ट भएको थियो । अनि आफ्ना छोराका परिवार कोही पनि नबाँचेको सुनेपछि मैले केही गर्नै सकिनँ, हातखुट्टा काम्न थाले’, मृतकका ६५ वर्षीय बुवा रामकृष्ण खनालले भन्नुभयो ।

उहाँको मनमा अनेक प्रश्नहरु उब्जिरहेका छन् : कसरी आगो लाग्यो ? सँगै रहेका छिमेकीले किन थाहा पाएनन् ? छिमेकीको घर किन केही भएन ? मेरै छोराको घर मात्रै किन जल्यो ? यस्ता अनेकौँ प्रश्नले उहाँको मनमा आगो बलिरहेको छ । त्यो जलेको घरको खरानी उठाउन नदिने बताउँदै उहाँका बुवा खनालले सरकारसँग घटनाको सुक्ष्म अनुगमन गरी सत्यतथ्य पत्ता लगाई अपराधी सार्वजानिक गर्न माग गर्नु भएको छ ।

आँखाभरी आँसु, मन गह्रौँ पार्दै मृतककी आमा इन्दिरा खनाल भक्कानिदै आफ्ना छोराको परिवारको मृत्यु दैवले नभई शत्रु लागेर भएको सुनाउनुभयो । त्यत्रो आगलागी हुँदा कसैले आगलागी भएको पत्तै नपाउनु शंकास्पद भएको बताउँदै उहाँले घटनाको छानबिनको माग गर्नुभयो ।

मृतक लक्ष्मणको घर बुवाका घर भन्दा झण्डै २ किलोमिटर टाढा छ । लालझोडा बस्न थालेको ४ वर्ष मात्रै भएको लक्ष्मण खनालले दुई महिनाअघि मात्र ट्रयाकर खरिद गरेका थिए र गाउँमै कृषि गर्दै आएका थिए ।

स्थानीय भन्छन् : थाहै पाइएन

घटना भएको ठाउँ लालझोडाका स्थानीयसँग बुझ्दा आगोले पुरै घर जलेर नष्ट भइसकेपछि मात्रै थाहा पाएको सुनाए । कोही चिच्याएको केही आवाज नआएको हिमा सापकोटाले बताउनुभयो ।

घटनापछि स्थानीयहरु पनि त्रसित बनेका छन् । सुरक्षाको माग गर्दै स्थानीय रीता दाहाल साँझ परेपछि डर लाग्ने, घरभित्र सुत्न रात कसरी बिताउने र यस्तो घटनाले गाउँमा बस्नै डर लाग्न थालेको बताउनुभयो ।

अर्का स्थानीय गणेसप्रसाद ढुङ्गेलकी श्रीमती गिता घिमिरे ढुङ्गेल आगो निभाउने प्रयास गर्दै गर्दा सिलिण्डर पड्किएर लाग्दा गम्भीर घाइते हुनुभएको छ । उहाँका अनुसार साढे १० बजे उहाँ पुग्दा सबै जलेर नष्ट भैसकेको थियो । आगलागी कसरी भयो, किन कसैले थाहा पाएनन् जस्ता कुराले परिवारकै ज्यान जानेगरी भएको आगलागीको घटना सुनियोजित भएको हो कि भन्ने लागेको र गाउँमा सुरक्षाको आवश्यक्ता भएको बताउनुभयो ।

परिवार र स्थानीयले घटना शंकास्पद भएको बताउन थालेपछि प्रहरीले छानबिन थालेको छ । शवको पोष्टमार्टम रिपोर्ट आउन बाँकी रहेको र छानबिन थालेको प्रहरीले जनाएको छ ।

कांग्रेस प्रवक्ता विश्वप्रकाश शर्माले घटनास्थलको निरीक्षण गरी मृतक लक्ष्मणका परिवारसँग भेट गर्नुभएको छ । प्रवक्ता शर्माले परिवार, छिमेकी र खनालका आफन्तसँगको भेटपछि घटना नियोजित भएको बताउँदै सरकारले यसको छानबिन गर्न आवश्यक रहेको बताउनुभएको छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुश्मा राजवंशी

झापामा बसेर पत्रकारिता गर्ने सुश्मा राजवंशी उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्