कश्मीर घटना : भारतले पाकिस्तानलाई सैन्य जवाफ दिने जाेखिम

वैशाख ११, २०८२ बिहीबार १७:५१:२६ | एजेन्सी

भारतीय प्रधानमन्त्री नरेन्द्र मोदीले जम्मू–कश्मीरको पहलगाममा २६ जनाको ज्यान जाने गरी भएको आतङ्कवादी आक्रमणका लागि जिम्मेवार सबैलाई सजाय दिने प्रतिज्ञा गर्नुभएको छ ।

बिहारमा मधुबनीमा आज भएको एक कार्यक्रममा बोल्दै प्रधानमन्त्री मोदीले हरेक आतङ्कवादी र तिनका समर्थकहरूलाई पहिचान गर्ने, पछ्याउने र दण्डित गर्ने बताउनुभएको बीबीसीले जनाएको छ । आतङ्ककारीहरूलाई पृथ्वीको कुना कुनासम्म खोज्ने मोदीको भनाइ छ ।

कश्मीरमा भएकाे आक्रमणलाई लिएर भारतले प्रतिशोधात्मक कदम चाल्न शुरू गरिसकेको छ । भारतले पाकिस्तानसँगको सीमामा रहेको मुख्य नाका बन्द गरेको छ । यस्तै पानी बाँडफाँटको सन्धि स्थगित गरेको छ । भारतले पाकिस्तानी कूटनीतिज्ञहरूलाई निष्कासित गरेको छ भने पाकिस्तानी राहदानी भएका मानिसहरूलाई ४८ घण्टाभित्र भारत छोड्न निर्देशन दिएको छ । पाकिस्तानले भने कश्मीरको घटनामा आफ्नो संलग्नता नभएको दाबी गरेको छ ।

यसैबीच भारतीय रक्षामन्त्री राजनाथ सिंहले दिएको चेतावनीलाई ठूलो महत्त्वका साथ हेरिएको बीबीसीको खबरमा उल्लेख छ । रक्षामन्त्री सिंहले पहलगाम आक्रमणका दोषीहरूलाई मात्रै नभई भारतीय भूमिमा त्यस्ता घृणित कार्यका योजनाकारहरूमाथि पनि कारबाही गर्ने उद्घोष गर्नुभएको छ ।

विश्लेषकहरूले अब भारतले सैन्य कारबाही गर्छ कि गर्दैन भन्ने प्रश्नभन्दा पनि कहिले, कसरी र कस्तो सैन्य कारबाही गर्छ भन्ने प्रश्न महत्त्वपूर्ण भएको ठानेका छन् । सैन्य इतिहासकार श्रीनाथ राघवनले भारतले पाकिस्तानी भूमिमा आक्रमण वा हवाई हमला गर्ने तय भइसकेको बताउनुभएको छ । यसअघि भारतले सन् २०१६ र २०१९ मा यस्तै आक्रमणपछि प्रतिवाद गरेको थियो ।

अमेरिकाको वाशिङ्टनमा रहेको एउटा थिङ्क ट्याङ्क विल्सन सेन्टरका दक्षिण एशिया निर्देशक माइकल कुगल्मन पनि आफ्ना नागरिकहरूमाथि लक्षित आक्रमण र धेरै मानिसको ज्यान जाने गरी भएको आक्रमणका कारण भारतले पाकिस्तानविरुद्ध सैन्य जवाफ दिने सम्भावना धेरै रहेको बताउनुहुन्छ ।

भारत र पाकिस्तान दुवै परमाणु अस्त्र सम्पन्न भएकाले यी दुईबीच तनाव चर्किँदा सबैतिर चासो र चिन्ता बढ्छ । पहलगाम घटनाले भारत–पाकिस्तान सम्बन्ध झनै चिसिने देखिएको छ ।

अन्तिम अपडेट: जेठ २, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

कश्मीर घटना : भारतले पाकिस्तानलाई सैन्य जवाफ दिने जाेखिम

तस्वीर : सामाजिक सञ्जाल

तपाईको प्रतिक्रिया