नेपाली क्रिकेटका लागि ऐतिहासिक दिन मार्च–१५

चैत १, २०७५ शुक्रबार २०:३३:५० | रासस

काठमाण्डाै - नेपाली क्रिकेटले कहिल्यै नभुल्ने मिति हो मार्च–१५ अर्थात एक दिवसीय मान्यता पाएको दिन । नेपालले अन्तराष्ट्रिय मान्यता पाएकाे एक वर्ष पूरा भएकाे छ । आजकै दिन नेपालले जिम्बावेमा भएकाे प्रतियाेगितामा नेपालले पपुवा न्यूगिनीलाइ हराउँदै चार वर्षका लागि एकदिवसीय मान्यता पाएकाे थियाे ।

अन्तर्राष्ट्रिय क्रिकेटमा पाइला चालेको २२ वर्षपछि नेपाली क्रिकेटले याे ऐतिहासिक सफलता पाएको थियो । उक्त सफलता नेपाली क्रिकेट र खेलकूद जगतले सधैँ सम्झने गर्छ । याे सफलताले सारा नेपालीलाई खुशी दिलाएको थियो । त्यसैले नेपाली खेलप्रेमीले मार्च १५ लाई सधैँ सम्झने गर्छन् ।

एकदिवसीय मान्यता पाएको एक वर्षभित्र नेपालले एकदिवसीय र टी–२० शृङ्खला समेत जितिसकेको छ । गत महिना नेपालले युएईविरुद्ध एक दिवसीय र टी–२० शृङ्खला जितेर एकदिवसीय मान्यताको सार्थकता पूरा गरिसकेको छ ।

गत वर्ष मार्चमा चार वर्षका लागि पहिलो पटक एक दिवसीय मान्यता पाएपछि नेपालले अगष्टमा नेदरल्याण्डसँग पहिलो एक दिवसीय शृङ्खला खेलेको थियो । दुई खेलको ऐतिहासिक शृङ्खला नेपालले १–१ को बराबरीमा टुङ्गायो ।

ऐतिहासिक शृङ्खला खेलेको झण्डै ६ महिनापछि नेपालले यूएईसँग अघिल्लो महिना टी–२० र एक दिवसीय शृङ्खला खेलको थियो । ती दुवै शृङ्खला नेपालले आफ्नो पक्षमा पार्न सफल भयो ।

डिभिजन ५ बाट यात्रा थालेको नेपालले त्यसअघि सन् २०१४ मा विश्वकप छनोट खेल्दै एकदिवसीय मान्यताको लागि प्रयास गरेको थियो तर, न्यूजिल्याण्डमा भएको त्याे छनोटमा कमजोर प्रदर्शन गरेपछि नेपाल नवौँ स्थानमा सीमित हुँदै डिभिजन ३ मा घटुवा भएको थियो । त्यसबेला हङकङ, यूएई, स्कटल्याण्ड र पपुवा न्यूगिनीले एकदिवसीय राष्ट्रको मान्यता प्राप्त गरेका थिए ।

नेपालले एकदिवसीय मान्यता पाएको दिन सम्झँदा विश्वकप छनोटसम्म पुर्‍याउने महत्वपूर्ण भूमिका खेलेका करण केसीलाई समेत सबैले सम्झने गर्छन् । डिभिजन २ अन्तर्गत क्यानडाविरुद्धको खेलमा एक विकेटको सनसनीपूर्ण जितमा करण नायक बनेका थिए ।

चुनौती एक दिवसीय मान्यता जोगाउन

चार वर्षका लागि पाएको एक दिवसीय मान्यता जोगाउन नेपाललाई निकै चुनौती छ । निलम्बित नेपाल क्रिकेट सङ्घ (क्यान)का अध्यक्ष चतुरबहादुर चन्द क्यान निलम्बन, पूर्वाधार निर्माणमा ढिलासुस्तीलगायत कारण नेपालले एक दिवसीय मान्यता जोगाउन अप्ठेरो पर्ने बताउँछन् ।

उनले भने, 'घरेलु क्रिकेटको व्यवस्थापनदेखि संरचनासम्म सबै अन्योलग्रस्त अवस्थामा छ, हामीलाई एक दिवसीय मान्यता जोगाउन निकै कठिन छ ।' एक दिवसीय मान्यता जोगाउन तत्काल प्रदेशस्तरीय खेल संरचना बनाउन सुरु गर्नुपर्ने र नयाँ पुस्ताका खेलाडी उत्पादनमा जोड दिनुपर्ने उनको सुझाव छ ।

नेपाली राष्ट्रिय टोलीका प्रशिक्षक जगत टमाटाले घरेलु क्रिकेटको संरचना, भौतिक पूर्वाधार, खेलाडीको हेरचाहलगायतमा प्रफेसनल सेटअप गर्नुपर्ने चुनौती नेपालसामु रहेको बताए । उनले भने, 'राम्रो संरचना बनाएर अघि बढ्ने हो भने एक दिवसीय मान्यतालाई चार वर्षमात्र होइन सधैँ कायम राख्न सकिन्छ ।'

राष्ट्रिय टोलीका कप्तान पारस खड्काले क्रिकेट पदाधिकारी र सरोकारवालाले जिम्मेवारी पूरा गर्न सके एक दिवसीय मान्यता जोगाउन सकिने तर्क गरे । 'सरकार र आफूलाई क्रिकेटका स्टेक होल्डरले आफ्नो जिम्मेवारी पूरा नगर्दा नेपालले पाएको सफलता गुम्ने खतरा छ, क्रिकेटको विकास लागि सक्षम क्रिकेट बोर्ड र घरेलु संरचनालाई बलियो बनउन सके एक दिवसीय मान्यता जोगाउन सकिन्छ', कप्तान खड्काको भनाइ छ

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्