खैँजडीको तालमा मुख्यमन्त्री छमछमी

चैत १०, २०७५ आइतबार १०:४०:४४ | रासस

तनहुँ – गण्डकी प्रदेशको भूमि व्यवस्था, कृषि तथा सहकारी मन्त्रालयको आयोजनामा ‘मुख्यमन्त्री नमूना कृषि गाउँ’ को घोषणा समारोह तनहुँको भिमाद नगरपालिका–९ भानुमतिमा तय भएबमोजिम मुख्यमन्त्री पृथ्वी सुब्बा गुरुङ शनिबार साँझ नै यहाँ आइपुग्नुभयो ।

मुख्यमन्त्रीको गुरुङको साथमा हनुहुन्थ्यो आर्थिक मामिला तथा योजनामन्त्री किरण गुरुङ, आन्तरिक मामिला तथा कानुनमन्त्री हरिबहादुर चुमान र भूमि व्यवस्था, कृषि तथा सहकारीमन्त्री लेखबहादुर थापा ।

उहाँहरुलाई स्थानीयले फूलमालाले स्वागत गर्दा रात परिसकेको थियो । मुख्यमन्त्री लगायत मन्त्रीहरुलाई स्वागत गरिसकेपछि स्थानीयले सांस्कृतिक कार्यक्रमको तयारी थाले । स्थानीयको तयारीपछि मुख्यमन्त्री गुरुङ लगायत मन्त्रीहरु सांस्कृतिक कार्यक्रमतर्फ अघि बढ्नुभयो ।

लगत्तै स्थानीयले खैँजडीको तालमा मुख्यमन्त्री र मन्त्रीहरुलाई स्वागत गर्दै गीत गाउन शुरु गरे । मुख्यमन्त्रीलगायत तीन मन्त्री गाउँमा आउँदा स्थानीयमा खुशीको सीमा नै थिएन । खुशीलाई स्थानीयले गीतमा यसरी प्रस्तुत गरे –

‘विकास गर्न भनेर मन्त्रीज्यू आउनुभाको छ
मनमा सारै खुशी लाको छ’

स्थानीयको स्वागत गीतसँगै मुख्यमन्त्री गुरुङ आफैँले खैजडी बजाउन थाल्नुभयो र गीतको तालमा नाच्न पनि । मुख्यमन्त्रीलाई साथ दिँदै आर्थिक मामिला तथा योजनामन्त्री गुरुङ, आन्तरिक मामिला तथा कानुनमन्त्री चुमान र भूमि, व्यवस्था कृषि तथा सहकारीमन्त्री थापासमेत नाच्न अगाडि बढ्नुभयो । मुख्यमन्त्री र मन्त्रीहरुलाई यहाँका स्थानीय युवतीले कौरा गीतमा साथ दिए ।

प्रदेश सरकारले प्रत्येक निर्वाचन क्षेत्रका एक/एक ठाउँलाई नमूना कृषि गाउँको रुपमा छनौट गरे बमोजिम भानुमति पनि नमूना कृषि गाउँको रुपमा छनौट भएको छ ।

नमूना गाउँको रूपमा छनौट भएदेखि नै यहाँका स्थानीय उत्साहित भएका छन् र यस ठाउँलाई नमूना बनाउने दृढता व्यक्त गरेका छन् जसलाई स्थानीयले गीत मार्फत् यसरी प्रस्तुत गरे –

‘सबै जना मिली कम्मर हामी कसे
नमूना गाउँ बन्छ अवश्य’

आफ्नै ठाउँमा काम गरे यही सुन फल्छ भन्ने भावना बोकेका यहाँका स्थानीय गाउँलाई नमूना बनाउँदै पर्यटकको आकर्षणको केन्द्रविन्दु बनाउन जुटेका छन् । सबैजना मिलेर अगाडि बढे उक्त लक्ष्य पूरा हुनेमा यहाँका स्थानीय ढुक्क छन् ।

‘सुन फल्छ नि यसै ठाउँमा
सबैजना मिली काम गरे गाउँमा’

नमूना गाउँको रूपमा छनौट भएको यस ठाउँमा हालै मात्र पाथर्दी घरबाससमेत सञ्चालनमा आइसकेको छ । यहाँ आउने पाहुनालाई कौरा गीतमार्फत् स्वागत गर्ने गरिएको घरबास सामुदायिक व्यवस्थापन समितिका अध्यक्ष शिवकुमार आलेले बताउनुभयो ।

नगरपालिका–९ का अध्यक्ष इमान थापाले यस ठाउँ नमूना कृषि गाउँको रूपमा छनौट हुँदा स्थानीयवासीमा छुट्टै रौनक छाएको बताउनुभयो । उहाँले भन्नुभयो, ‘मुख्यमन्त्री र मन्त्रीहरु नै यहाँ आएर स्थानीयको हौसला बढाउन लाग्नुभयो, यसले हामीहरुलाई काम गर्न हौसला प्रदान गरेको छ ।’

कौरा संरक्षणका लागि सहयोग

सो अवसरमा मुख्यमन्त्री पृथ्वीसुब्बा गुरुङले मौलिक कौरा संरक्षणका लागि रु पाँच हजार सहयोग गर्नुभएको छ ।

त्यस्तै आर्थिक मामिला तथा योजनामन्त्री किरण गुरुङले रु पाँच हजार, आन्तरिक मामिला तथा कानुनमन्त्री हरिबहादुर चुमानले रु दुई हजार, भूमि व्यवस्था, कृषि तथा सहकारीमन्त्री लेखबहादुर थापाले रु एक हजार पाँच सय सहयोग गर्नुभएको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्