सगरमाथा क्षेत्रमा संकलित फोहोर काठमाण्डौमा

वैशाख ८, २०७६ आइतबार ८:४८:५० | सुवास दर्नाल

सोलुखुम्बु – सगरमाथा क्षेत्रमा संकलन भएको फोहोर काठमाण्डौ लगिएको छ । सरसफाइ अभियान नै सञ्चालन गरी संकलन गरिएको १ हजार किलोग्राम फोहोर शनिबार काठमाण्डौ लगिएको हो ।

नेपाली सेनाको हेलिकप्टर मार्फत १ हजार किलोग्राम फोहोर काठमाण्डौ र एक हजार किलोग्राम फोहोर ओखलढुंगा लगिएको अभियानमा सहभागी संस्था सगरमाथा राष्ट्रिय निकुञ्जको कार्यालय नाम्चेले जनाएको छ ।

स्थानीय स्तरमा व्यवस्थापन गर्न सकिने वस्तुलाई नाम्चे क्षेत्रमा नै व्यवस्थापन गरिएको छ । केही कुहिने बस्तुसहितको फोहोरलाई ओखलढुंगा र नकुहिने सिसाको बोत्तलजस्ता प्रशोधन गर्न सकिने बस्तुलाई काठमाण्डौ पठाइएको निकुञ्जका प्रमुख प्रमोद भट्टराईले जानकारी दिनुभयो ।

१२ औँ अन्तर्राष्ट्रिय सगरमाथा दिवसको अवसरमा सगरमाथा क्षेत्रको लुक्लादेखि स्याङ्बोचे क्षेत्रमा फोहोर संकलन गरिएको हो ।

वैशाख १ गतेदेखि सुरु भएको सरसफाइ अभियानमा खुम्बु पासाङल्हामु गाउँपालिका, नेपाली सेना, संस्कृति, पर्यटन तथा नागरिक उड्डयन मन्त्रालय, पर्यटन विभाग, नेपाल पर्यटन बोर्ड, वन तथा वातावरण विभाग, सगरमाथा राष्ट्रिय निकुञ्ज मध्यवर्ती क्षेत्र र सगरमाथा प्रदुषण नियन्त्रण समितिको सहभागिता रहेको छ ।

यो टोलीले पाँच दिन लगाएर लुक्ला, टोकटोक, जोरसल्ले, नाम्चे, फोरचे, थामे, स्याङ्बोचे लगायतको क्षेत्रबाट संकलन गरेको फोहोर पठाएको हो । जेठ २२ गतेसम्म जारी रहने यो अभियानमा सगरमाथाको चुचुरोसम्म नै सफाइ गर्ने बताइएको छ । सगरमाथा आधारशिविरसम्म दैनिक ३० जनाको टोलीले सरसफाइ गर्ने, सरमाथाको चुचुरोसम्म ८ जनाले काम गर्ने सगरमाथा प्रदुषण नियन्त्रण समिति (एसपीसीसीका)का अध्यक्ष आङदोर्जे शेर्पाले जानकारी दिनुभयो ।

सगरमाथा क्षेत्रमा फोहोर बढेको प्रति सर्वत्र चिन्ता व्यक्त भैरहेको बेला सगरमाथा दिवसको अवसर पारेर सफाइ अभियान सञ्चालन गरिएको हो । हिमाल आरोहण तथा पदयात्रामा आउने पर्यटकका कारण उत्पन्न फोहोर व्यवस्थापनमा चुनौती भैरहेको बेला यस्ता अभियानले महत्वपूर्ण भुमिका खेल्ने पर्यटन व्यवसायीले विश्वास लिएका छन् ।

संकलन गरी काठमाण्डौ लगिएको फोहोरलाई विश्व वातावरण दिवस (जुन ५) का दिन काठमाण्डौमा प्रदर्शन गरी ‘ब्ल्यू वेस्ट टु भ्यालु’ नामक फोहोर व्यवस्थापन संस्थालाई हस्तान्तरण गरिने छ ।

४५ दिनसम्म चल्ने सफाइ अभियानमा २ करोड ३२ लाख १६ हजार रुपैयाँ खर्च हुने बताइएको छ । अभियानका लागि खुम्बु पासाङल्ह्यामु गाउँपालिकाले ३० लाख तथा नेपाल पर्वतारोहण संघले २० लाख र विश्व वन्यजन्तु कोषले २० लाख सहयोग गर्ने जनाएका छन् ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुवास दर्नाल

उज्यालोका सोलुखुम्बु सहकर्मी सुवास दर्नाल हिमाल एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्