जापानको एक एयरोस्पेस स्टार्टअप कम्पनीले अन्तरिक्षमा रकेटको सफलतापूर्वक प्रक्षेपण गरेको छ । इन्टरस्टेलर टेक्नोलोजी कर्पाेरेशनका अनुसार, मानवरिहत मोमो–३ रकेट प्रशान्त महासागरमा खस्नु अघि एक सय किलोमिटर (६० माइल) उचाइसम्म पुगेको थियो । 

कम्पनीले एक व्यवसायिक रकेट अन्तरिक्षसम्म पुग्न सक्ने कुरालाई यो रकेट प्रक्षेपणले साबित गरेको जनाएको छ । १० मिटर लामो र ५० सेन्टिमिटर व्यास रहेको रकेटको तौल झण्डै एक टन रहेको छ । रकेट पेलोड (अन्तरिक्ष उपकरण) को कक्षामा छोड्न सक्षम छ । 

सन् २०१७  र २०१८ मा दुई पटक असफलतापछि कम्पनीले शनिबार निकै ठूलो उपलब्धी हासिल गरेको हो । यो निजीस्तरमा विकसित गरिएको अन्तरिक्षसम्म पुग्न सक्ने जापानको पहिलो रकेट हो । 

लाइभडोर कम्पनीका पूर्व अध्यक्ष ताकाफुमी होरीले सन् २०१३ मा स्थापना गरेको कम्पनीको उद्देश्य उपग्रहहरुलाई अन्तरिक्षमा लैजानका लागि कम लागतमा व्यवसायिक रकेट बनाउनु हो ।